काठमाडौँ । सूर्यदर्शन सहकारी ठगी प्रकरणमा मुछिएका राष्ट्रिय स्वतन्त्र पार्टीका सभापति एवं पूर्वगृहमन्त्री रवि लामिछानेसहित चार जनाविरुद्ध सम्पत्ति शुद्धीकरण कसुरमा जिल्ला अदालत कास्कीमा मुद्दा दायर भएको छ ।
रविसँगै रामबहादुर खनाल, छविलाल जोशी र लीला पछाइविरुद्ध आइतबार सम्पत्ति शुद्धिकरणमा मुद्दा दायर गरिएको हो । पूर्वगृहमन्त्री लामिछानेमाथि २७ करोड ८९ लाख ४४ हजार सात सय रुपैया बिगो दाबी गरिएको छ । सरकारी वकिल कार्यालयका अनुसार सहकारी ठगी प्रकरणमा हालसम्म ६३ जनाविरुद्ध जिल्ला अदालत कास्कीमा मुद्दा दायर गरिएको छ ।
मुद्दा दर्ता भएसँगै अब रविको सांसद पद के हुन्छ भन्नेमा प्रश्न उठेको छ । सम्पत्ती शुद्दिकरण ऐनअनुसार कुनैपनि जनप्रतिनिधि वा सरकारी संस्थाका प्रतिनिधिउपर कुनै कसुरमा अदालतमा मुद्दा दर्ता भएमा सो मुद्दाको किनारा नलागेसम्म निजको पद निलम्बनमा पर्ने व्यवस्था छ । यसैमा टेकेर कानुनका जानकारहरुले रविको सांसद पद स्वतः निलम्बनमा पर्ने जनाएका छन्।
सम्पत्ति शुद्धीकरण निवारण ऐन, २०६४ को दफा (२७) बमोजिम प्रचलित कानून बमोजिम स्थापित संगठित संस्थाको कुनै पदाधिकारी वा कर्मचारी वा कुनै राष्ट्र सेवक यस ऐन बमोजिम थुनामा रहेकोमा त्यसरी थुनामा रहेको अवधिभर र निज उपर दफा २२ बमोजिम मुद्दा दायर भएकोमा सो मुद्दाको किनारा नभएसम्म त्यस्तो कर्मचारी, पदाधिकारी वा राष्ट्र सेवक स्वतः निलम्बन भएको मानिने उल्लेख छ ।
सहकारी बचत रकम अपचलन गरेको आरोपमा सभापति लामिछाने गत कात्तिक २ गते काठमाडौँबाट पक्राउ पर्नुभएको थियो । उहाँमाथि कास्कीसहित अन्य जिल्लासमेत सहकारी ठगीको आरोपमा अनुसन्धान भइरहेको छ ।
प्रतिक्रिया