काठमाडौं । जनता समाजवादी पार्टी (जसपा) ले संविधान संशोधन र पुनर्लेखनको प्रमुख ऐजेन्डा सहित आफ्नो चुनावी घोषणा पत्र सार्वजनिक गरेको छ ।
जसपाले संघीय संसद र प्रदेशसभाहरु पूर्ण समानुपातिक निर्वाचन प्रणालीबाट चयन गर्ने, कुनै पनि व्यक्ति दुई कार्यकाल भन्दा बढी कार्यकारी प्रमुख हुन नपाउने व्यवस्था गर्ने पनि घोषणा गरेको छ । प्रत्यक्ष निर्वाचित कार्यकारी राष्ट्रपति सहितको शासकिय स्वरुपको जसपाले परिकल्पना गरेको छ । कार्यकारी राष्ट्रपतिले समावेशी रुपमा सक्षम व्यक्तिहरुको छनोट गरी मन्त्रिपरिषद बनाउने, मन्त्रीहरु राजनीतिज्ञ र विशेषज्ञहरु मध्येबाट राष्ट्रपतिले नियुक्त गर्ने जसपाको घोषणा पत्रमा उल्लेख गरेको छ ।
त्यस्तै जसपाले आगामी निर्वाचन जितेपछि आर्थिक विकासको मुख्य लक्ष्य र उद्देश्य लिने घोषणा गरेको छ । जसपाले आर्थिक बृद्धिदर उच्च राख्न पूँजी निर्माण तथा परिचालन, नयाँ प्रविधिको उपयोग र विकासका साथै विभिन्न रूप र स्थितिमा रहेका उत्पादक शक्तिहरूको क्षमता विकास एवं प्रभाव विस्तारमा जोड दिने, पाँच वर्षमा निरन्तर २ अङ्कको आर्थिक वृद्धि हासिल गर्ने र प्रति व्यक्ति आय ५ हजार डलर पुर्याउने लगायतका आर्थिक योजना समेटेको छ ।
साथै सन्तुलित परराष्ट्र निती, स्वतन्त्र र सक्षम न्यायालय, कृर्षिको विकासका लागि दुई बर्ष भित्रै नेपालमा रासायनिक मल कारखाना खोल्ने, ५ बर्षमा १० हजार मेघावाट विद्युत उत्पादन, प्रशस्त रोजगारिका अवसर सिर्जना गर्ने, १२ कक्षसम्म निशुल्क गुणस्तरिय शिक्षा, दिर्घ रोगिहरुको निशुल्क स्वास्थ्य उपचार, भ्रष्टाचार न्युनिकरण गर्न सम्बन्धीत निकायहरुलाई साधन सम्पन्न र सक्षम बनाउने जस्ता लोकप्रिय घोषणा गरेको छ । त्यसैगरि पूर्वपश्चिम राजमार्गलाई स्तरोन्नति गरी ४ लेनको बनाउने, काठमाडौंको रिङरोडलाई ५ वर्षभित्र साइकल लेनको व्यवस्था गरी ८ लेन बनाउने, निर्माणाधीन मध्य पहाडी लोकमार्ग र हुलाकी सडकलाई सम्पूर्ण रुपले निर्माण सम्पन्न गर्ने ।
पुष्पलाल लोकमार्ग र निर्माणकार्य सुरु भएका उत्तर दक्षिण मार्गहरूको निर्माण कार्यलाई उच्च प्राथमिकतामा राख्ने लगाएतका पूर्वाधार विकासको पाटोलाई पनि जसपाले समेटेको छ । त्यस्तै प्राकृतिक स्रोत साधनको दोहोन हुन नदिने, चुरे संरक्षण कार्यक्रमलाई प्रभावकारी रुपमा सञ्चालन गर्ने, बाढी पहिरो लगाएतका विपदबाट जोगिन आवश्यक उपकरणको व्यवस्था गर्ने लगाएतका बिषयलाई पनि जसपाले घोषणा पत्रमा समेटेको छ ।
प्रतिक्रिया