आजको मौसमः देशभरको तापक्रम घट्दै, कोशीमा हल्का वर्षाको सम्भावना

काठमाडौं । हाल देशमा पोस्ट मनसुन चलिरहेको छ ।

सँगसँगै पछिल्ला दिनमा पश्चिमी वायुका साथै स्थानीय वायुको प्रभावले मुलुकका कतिपय स्थानमा बदली र वर्षा पनि जारी छ । मौसम मौसम पूर्वानुमान महाशाखाले मनसुन सकिएर पोस्ट मनसुन चलिरहेकाले देशभरको तापक्रम घट्न थालेको र आवश्यक सतर्कता अपनाउन आग्रह समेत गरेको छ ।

महाशाखाका अनुसार हिजो (सोमबार) र आज (मंगलबार) काठमाडौं उपत्यकाको तापक्रम १६ डिग्री हाराहारी कायम रहेको छ । साथै महाशाखाले लुम्बिनी, सुदूरपश्चिम र कर्णाली प्रदेशमा पश्चिमी वायुको सामान्य प्रभाव रहनुका साथै बाँकी प्रदेशहरूमा पश्चिमी वायुको साथै स्थानीय वायुको पनि आंशिक प्रभाव रहेको पनि बताएको छ।

महाशाखाले आज दिउँसो कोशी प्रदेश लगायत बागमती प्रदेश र गण्डकी प्रदेशमा पहाडी भू–भागमा आंशिकदेखि साधारणतया बदली रही बाँकी भू–भागमा आंशिक बदलीदेखि मौसम मुख्यतया सफा रहने बताएको छ। कोशी प्रदेशका थोरै स्थानहरूमा तथा मधेश प्रदेशका साथै बागमती प्रदेश र गण्डकी प्रदेशका पहाडी भू–भागका एक–दुई स्थानमा हल्कादेखि मध्यम वर्षाको सम्भावना रहेको पनि महाशाखाले जनाएको छ।

यस्तै कोशी प्रदेशका एक–दुई स्थानमा मेघ गर्जन र चट्याङ्गसहित हल्का वर्षाको सम्भावना रहेको महाशाखाले जनाएको छ।