झापा । पछिल्लो २४ घण्टामा सबैभन्दा धेरै बर्षा झापामा भएको छ ।
गएराति देखि परेको अविरत बर्षाका कारण यतिबेला झापाका विभिन्न नदी तथा खोलाहरुमा बाढी आएको छ । झापाको चन्द्रगढी विमानस्थलमा रहेको जल तथा मौसम विभागको मापन केन्द्रका अनुसार झापामा हालसम्म ३ सय २ मिलिमिटर बर्षा भएको छ ।
यसैबीच कचनकवल गाउँपालिका–२ स्थित अमरखुट्टा खोला तर्ने क्रममा आज दिउँसो प्र १–०२–००५ प ६९७८ नम्बर प्लेट भएको मोटरसाइकल खोलाले बगाएको जिल्ला प्रहरी कार्यालय झापाले जानकारी दिएको छ । यद्यपी मोटरसाइकल चालक सोही ठाउँमा बस्ने २७ बर्षीय रवीन भट्टराई भने सकुशल रहेका छन् ।
निरन्तरको बर्षाले झापामा हवाई उडान समेत प्रभावित भएको छ । शुक्रबार झापाको चन्द्रगढी विमानस्थलमा कुनैपनि उडान तथा अवतरण नभएको विमानस्थल प्रशासनले जनाएको छ ।
प्रतिक्रिया