नारायणी नदीमा एक जनाको शव फेला, गणपति डिलक्समा सवार यात्रु भएको पुष्टि

चितवन । चितवनको भरतपुर–२८ स्थित नारायण नदी किनारमा एक जनाका शव फेला परेको छ ।

उक्त शव सिमलताल पहिरोले बगाएको बसको यात्रुको यात्रुको भएको पुष्टि भएको छ । प्रहरीका अनुसार उक्त शव गणपति डिलक्समा सवार यात्रुको रहेको बुझिएको छ । नदी किनारमा घोप्टो परेको अवस्थामा उनको शव भेटिएको जिल्ला प्रहरी कार्यालय चितवनले जानकारी दिएको छ । शवको साथमा केही कागजात पनि भेटिएको छ ।

प्राप्त कागजातको आधारमा उनी भारतीय नागरिक ऋषि पल साह रहेको खुलेको प्रहरीको भनाइ छ । काठमाडौंबाट रौतहटको गौरतर्फ आउने क्रममा पहिरोमा परेर बेपता भएको गणपति डिलक्समा २९ जना सवार यात्रु रहेका थिए ।

बागमती प्रदेश–०३–००१ ख २४९५ नम्बरको बस त्रिशूलीमा खस्दा बसमा सवारमध्ये नन्दन दास, सुरज प्रसाद गुप्ता र जगेश्वर यादव बसबाट हाम फालेर नदीबाट बाहिर आएका थिए ।