क्यान्टोनमेन्ट घोटालाको फाइल खोल्न गृहमन्त्रीलाई सांसद शाहीको चुनौती

काठमाडौं । राष्ट्रिय प्रजातन्त्र पार्टीका प्रमुख सचेतक ज्ञानबहादुर शाहीले क्यान्टोनमेन्ट घोटालाको फाइल खोल्न उपप्रधानमन्त्री एवं गृहमन्त्री रवि लामिछानेलाई चुनौती दिएका छन् ।

आइतबारको प्रतिनिधिसभा बैठकमा विशेष समयमा बोल्दै प्रमुख सचेतक शाहीले गृहमन्त्री लामिछानेलाई जीबी राईलाई पक्राउ गरेर ल्याउन पनि चुनौती दिए । अझै सरकारको ७ दिन बाँकी रहेको भन्दै उनले यो बीचमा भ्रष्टाचारका फाइलहरू खोलेमा आफूहरूको साथ र समर्थन रहने बताए । उनले सुकुम्वासीहरूलाई खोला किनारबाट हटाउन काठमाडौं महानगरपालिकाले पत्र पठाएर गृहमन्त्रीलाई पटकपटक आग्रह गरे पनि प्रहरी नपठाएको बताए ।

उनले गृहमन्त्रीले संसदमा आएर ठूलो कुरा मात्रै गरेको बताए । प्रमुख सचेतक शाहीले संविधान संशोधन गर्नुपर्ने बताए । उनले जनताबाट प्रत्यक्ष निर्वाचित कार्यकारी प्रधानमन्त्री हुने व्यवस्थामा जानुपर्ने बताए ।