किन बनाइयो अस्ट्रेलियामा नेपालको जस्तै गाउँ ? यस्तो छ भित्रि रहस्य…

काठमाडौं । नेपालको आठौँ प्रदेश अस्ट्रेलिया ! यसो भन्दा आश्चर्य नलाग्ला ।

पढ्न होस या कमाउन अथवा रमाउन, नेपालीको पहिलो रोजाईको गन्तव्य बनेको छ अस्ट्रेलिया । लहरो तान्दा पहरो भनेझैँ एकै घरको एक पछि अर्को गर्दै कयौँ नेपाली परिवार अस्ट्रेलियामै जमिसकेका छन् । त्यसैले त होला, अस्ट्रेलियालाई नेपालको आठौँ प्रदेश भनेर व्यङ्ग्य गर्ने गरिएको ।

अस्ट्रेलियाली सहरका गल्ली गल्लीमा नेपाली कति भेटिन्छन् भन्ने आंकलन या अड्कल यतिकै पनि लाउन सकिन्छ । तर, अस्टे«लियामा नेपाली गाउँ बनाइयो । त्यो पनि नेपालीले होइन । यो चाहीँ धेरैको लागि अनौठो प्रसंग हुन सक्छ । पुतली लज,पराजूली कार्पेट्स, दरबाङ फ्रेसहाउस तथा तरकारी पसल, नेपाल प्रहरीको गाडी र सँगै माउन्ट एभरेष्ट टूर बस । नेपाली गाउँ, गाउँका घरलाई मात्रै होइन भिरपाखालाई पनि हुबहु उतारिएको छ ।

अझै यो तरकारी पसल अगाडी राखिएको मकैको झुत्ता हेर्नुस त, लाग्छ साँच्चिकै नेपालकै कुनै गाउँमा गएर बनाइएको भ्लग हेर्दै छौँ । तर, यो बसोबासका लागि बनाइएको गाउँ भने होइन । यो गाउँ एक हलिउड सिनेमाका लागि बनाइएको हो । सिनेमा हो, ‘आइस रोड २ः टु दि स्काई’ यसको पहिलो श्रृङ्खला ‘आइस रोड’ तपाईँहरुमध्य धेरैले हेर्नुभएको पनि होला ।

सिनेमा छायाँङ्कनकै लागि यतिबेला निर्माता टोली अस्ट्रेलियामा छ । अस्कर नोमिनेसनमा परिसकेका लायम निसन अभिनित उक्त सिनेमामा नेपाली दुर्गम गाउँको कथा समेट्नुपर्ने भएकाले भिक्टोरिया राज्यको गिप्सल्याण्डस्थित वालहलाको एक क्षेत्रलाई नेपाली हिमाली भेगको झल्को दिने गरि सजाइएको हो ।

नेपालको पहिचान र संस्कृति झल्कने गरि तयार पारिएको उक्त गाउँमा झण्डै एक साता सिनेमा छायाँकन हुने जनाइएको छ । सिनेमाको कथामा अभिनेता लिसन आफ्नो भाइको अस्तु सेलाउन सगरमाथा जाँदाको दृश्य देखाउन खोजिएको छ । सिनेमामा सहभागि हुनका लागि भिक्टोरिया राज्यमा रहेका २० देखि ७० बर्षसम्मका नेपालीहरुलाई आग्रह गरिएको छ ।

अस्ट्रेलियाको अर्थतन्त्रमा ३० मिलियन डलरको योगदान पुग्ने र त्यस क्षेत्रका ६ सय भन्दा बढी स्थानियलाई रोजगार बनाउने गरि साताभर सिनेमाको छायाँकन हुँदैछ भनिएको छ । नेपाल र सगरमाथा प्रतिको प्रेम हलिउड सिनेमाको कथाबस्तु बन्नु गर्वको कुरा हो ।

अझ, नेपालबाट टाढा रहेका नेपालीहरुका लागि त खुसी दुई गुणा बढी हुनेनै भयो । तैपनी, भएको गाउँ र आँखै अघि उभिएको सगरमाथा छाडेर कृत्रिम सगरमाथा निर्माण, यसमा कतै हामिनै चुकेका त होइनौँ ?