विपक्षीको अवरोधले स्थगित भएको दुवै सदनको बैठक आज बस्दै

काठमाडौं । आइतबार प्रतिपक्षी दलहरुको अवरोधका कारण स्थगित भएको प्रतिनिधि सभा र राष्ट्रिय सभाको बैठक आज बस्दैछ ।

राष्ट्रपतिले नागरिकता प्रमाणिकरण गरेको बिषयलाई लिएर आइतबार विपक्षी दलहरुले संसदमा अवरोध जनाएका थिए । विपक्षीहरुको अवरोधका कारण स्थगित भएको उक्त बैठक आज बस्न लागेको हो । आइतबार दुवै सदनको बैठक सुरु हुनेबित्तिकै एमाले लगायत प्रतिपक्षी दलहरूले विरोध गर्दं बैठक अवरुद्ध पारेका थिए ।

विपक्षी दलहरूले नाराबाजी गरेपछि सभामुख देवराज घिमिरेले प्रतिनिधि सभा बैठक एक घण्टाका लागि स्थगित गरेका थिए । तर, दलहरूबीच सहमति हुन नसकेपछि आइतबार बैठक बस्न सकेन । आज प्रतिनिधि सभा बैठक ११ बजेका लागि बोलाइएको छ । यसैगरी राष्ट्रिय सभा पनि आज १ बजेका लागि बोलाइएको छ ।

विपक्षी दलहरूले राष्ट्रपति रामचन्द्र पौडेलबाट प्रमाणीकरण भएको नागरिकता विधेयक, प्रधानमन्त्री प्रचण्डको भारत भ्रमणको विषयलाई लिएर संसदमा विरोध गरेका थिए ।