काठमाडौं । नेपाल शैक्षिक परामर्श संघ (इक्यान) ले विभिन्न शैक्षिक परामर्श संस्थामाथि हालै गरिएको अनुगमन, छापा, धरपकड तथा नियन्त्रणका गतिविधिप्रति गम्भीर आपत्ति जनाएको छ ।
संघले प्रेस विज्ञप्ति जारी गर्दै काठमाडौं उपत्यका अपराध अनुसन्धान कार्यालयसहित सम्बन्धित सुरक्षा तथा प्रशासनिक निकायहरूको पछिल्लो कारबाहीलाई आफूहरूले संवेदनशील रूपमा लिएको जनाएको हो । वि.सं. २०५४ सालदेखि सञ्चालनमा रहेको इक्यानले आफू सदैव विधिको शासन, विद्यार्थी हित, उपभोक्ता संरक्षण, वित्तीय पारदर्शिता तथा नेपाल सरकारका कानूनी र नियामकीय मापदण्डप्रति प्रतिबद्ध रहेको स्पष्ट पारेको छ ।
संघले शिक्षा क्षेत्रको नाममा हुने ठगी, झुटा आश्वासन, नक्कली कागजातको प्रयोग, अवैध आर्थिक कारोबार तथा विद्यार्थी–अभिभावकमाथिको विश्वासको दुरुपयोगजस्ता गतिविधि कुनै पनि हालतमा स्वीकार्य नहुने उल्लेख गरेको छ । यस्ता कार्यमा संलग्न व्यक्ति वा संस्थामाथि निष्पक्ष, पारदर्शी र कडा कानूनी कारबाही हुनुपर्नेमा पनि इक्यानले जोड दिएको छ । तर, पछिल्लो समय अपनाइएको अनुसन्धान तथा नियामकीय कार्यशैलीप्रति भने संघले गम्भीर चिन्ता व्यक्त गरेको छ ।
केही सीमित घटनालाई आधार बनाएर सम्पूर्ण शैक्षिक परामर्श क्षेत्रलाई बदनाम गर्ने प्रयास भइरहेको भन्दै इक्यानले त्यसप्रति असन्तुष्टि जनाएको हो । संघका अनुसार केही व्यक्तिको कमजोरीलाई लिएर सम्पूर्ण क्षेत्रलाई एउटै दृष्टिकोणबाट हेर्ने प्रवृत्तिले वैधानिक संस्थाहरूको प्रतिष्ठामा नकारात्मक असर पार्नुका साथै नेपालको अन्तर्राष्ट्रिय शैक्षिक छवि र विश्वसनीयतामाथि समेत प्रश्न उठ्ने जोखिम रहेको छ ।
यसले इमान्दार व्यवसायीहरूको मनोबल कमजोर बनाउने र समग्र क्षेत्रको स्थायित्वमै चुनौती सिर्जना गर्न सक्ने इक्यानको भनाइ छ । इक्यानले कानून उल्लंघन गर्ने जोसुकैमाथि कडा कारबाही आवश्यक रहेको दोहोर्याउँदै कानून कार्यान्वयनको नाममा वैधानिक व्यवसायलाई अपराधीकरण गर्ने, डिजिटल युगका चुनौतीलाई बेवास्ता गर्ने तथा शिक्षा क्षेत्रमा निजी क्षेत्रले दिएको योगदानको अवमूल्यन गर्ने प्रवृत्ति स्वीकार्य नहुने स्पष्ट पारेको छ ।
प्रतिक्रिया