काठमाडौं । इजरायलमा हमासद्वारा नियन्त्रणमा लिइएका नेपाली विद्यार्थी विपिन जोशी अब जीवित नरहेको इजरायली सेनाका अधिकारीले औपचारिक रूपमा पुष्टि गरेका छन्।
इजरायली रक्षा बल (आईडीएफ) का एक अधिकारीले इजरायलको स्थानीय समय अनुसार आज बिहान साढे ७ बजे विपिन अब जीवित नरहेको जानकारी दिएका हुन्। उक्त जानकारी इजरायलका लागि नेपाली राजदूत धनप्रसाद पण्डित, अमेरिकामा रहेकी विपिनकी बहिनी, नेपालमा रहेका उनका दाजु किशोर जोशी, तथा इजरायलको प्रधानमन्त्री कार्यालयका दुई अधिकारीहरुलाई समावेश गरी भिडियो कन्फरेन्समार्फत दिइएको राजदूत पण्डितले बताएका छन्।
राजदूत पण्डितका अनुसार, ‘आईडीएफका अधिकारीले हामीलाई स्पष्ट शब्दमा भने— विपिन इज नो मोर।’ हाल अमेरिकाको पहलमा इजरायल र हमासबीच भएको युद्धविराम अन्तर्गत हमासको नियन्त्रणमा रहेका जीवित र मृतक बन्दीहरु मुक्त गर्ने प्रक्रिया चलिरहेको छ। तर, सार्वजनिक भएका नामावलीमा विपिनको नाम भने समावेश गरिएको छैन।
कञ्चनपुरका विपिन जोशी अध्ययनका क्रममा इजरायल पुगेका थिए। सन् २०२३ अक्टोबर ७ मा हमासले किबुत्ज क्षेत्रमा गरेको आक्रमणका बेला उनी बन्धक बनेका थिए। सो हमलामा १० जना नेपाली विद्यार्थीले ज्यान गुमाएका थिए भने विपिनलाई हमास लडाकुहरूले आफ्नो साथमा लगेका थिए। विपिन सन् २०२३ नोभेम्बर १७ मा गाजास्थित अल शिफा अस्पतालमा अन्तिम पटक देखिएका थिए, तर त्यसपछि उनको अवस्था अज्ञात रह्यो।
गत बुधबार उनको एउटा पुरानो भिडियो सार्वजनिक भएपछि फेरि चर्चा भएको थियो। उनको अवस्था बुझ्नका लागि सरकारले निरन्तर कूटनीतिक पहल गर्दै आएको थियो। विपिनकी आमा र बहिनी यसअघि इजरायल पुगेर फर्किएका थिए, र हाल उनीहरू अमेरिकामा छन्।
तर लामो प्रयासपछि पनि विपिनको उद्धार सम्भव हुन सकेन, जसले सम्पूर्ण नेपाली समुदायलाई गहिरो दुःखमा डुबाएको छ।
प्रतिक्रिया