बागमती र सहायक नदीहरूमा जलस्तर बढ्दै, तटीय बस्ती उच्च जोखिममा

काठमाडौं । उपत्यकाका मुख्य नदी तथा खोलामा लगातार बढ्दो जलस्तरसँगै डुबान र बाढीको खतरा तीव्र बनेको छ ।

ललितपुरको खोकना जलमापन केन्द्रमा बागमती नदीको सतर्कता तह ३.५ मिटर भए पनि हाल जलस्तर ३.५८ मिटर पुगेको छ । त्यस्तै, बालकुमारीस्थित मनोहरा खोलामा ४.४ मिटर सतर्कता तह पार भइसकेको छ भने नख्खु खोलामा समेत पानीको मात्रा बढ्दो छ ।

मौसमविद्हरूले आगामी २४ घण्टासम्म वर्षा नरोकिने अनुमान गरेका छन् । यसले गत वर्षको जस्तै ठूलो बाढी आउने सम्भावना बढाएको उनीहरूको चेतावनी छ ।

विशेषगरी हनुमन्ते खोला, विष्णुमति खोला, नख्खु खोलाको मेडिसिटी वरपर, कालिमाटी तरकारी बजार, बल्खु तरकारी बजार र आसपासका क्षेत्र उच्च जोखिममा रहेका छन् ।

यसैबीच, स्थानीय प्रशासनले नदी किनार र तटीय बस्तीमा बसोबास गर्ने नागरिकलाई सजग रहन र सुरक्षित स्थानमा जान आग्रह गरेको छ ।