काठमाडौं । नेपालमा मनसुनको न्यून चापीय रेखा हाल तराई आसपास रहेपनि बिस्तारै दक्षिणतर्फ खस्दै जाने अनुमान गरिएको छ।
मौसम पूर्वानुमान महाशाखाका अनुसार यसका कारण देशभर मनसुनको प्रभाव केही कमजोर हुँदै जानेछ। यद्यपि, बङ्गालको खाडीबाट आउने जलवाष्पयुक्त हावाको प्रभाव भने यथावत् रहनेछ। आज बिहान सुदूरपश्चिम प्रदेशसहितका पहाडी क्षेत्रमा सामान्य बदली रही बाँकी स्थानहरूमा आंशिक बदली देखिएको छ।
कोशी, बागमती, गण्डकी र कर्णालीका केही भागहरूमा तथा मधेस, लुम्बिनी र सुदूरपश्चिमका एक-दुई स्थानमा मध्यम वर्षा भइरहेको छ। दिउँसो पनि यस्तै मौसमी स्थिति रहनेछ। सुदूरपश्चिम र अन्य पहाडी भूभागका थोरै स्थानमा मध्यम वर्षा हुने सम्भावना छ भने तराईका केही भागमा हल्का देखि मध्यम वर्षा पर्न सक्छ।
राति देशभर सामान्य बदली रहने पूर्वानुमान गरिएको छ। कोशी, बागमती र गण्डकीका पहाडी भूभागमा मध्यम वर्षा हुने र कोशी तथा गण्डकीका एक-दुई स्थानमा भारी वर्षा पर्न सक्ने सम्भावना छ।
महाशाखाले कोशी र गण्डकी प्रदेशका पहाडी क्षेत्रमा भारी वर्षा हुन सक्ने भन्दै आवश्यक सतर्कता अपनाउन सबैलाई आग्रह गरेको छ।
प्रतिक्रिया