काठमाडौं । सङ्घीय निजामती सेवा विधेयकको ‘कुलिङ अफ पिरियड’ सम्बन्धी व्यवस्थामा भएको भनिएको चलखेलका कारण चर्चामा आएका प्रतिनिधि सभा अन्तर्गतको राज्य व्यवस्था तथा सुशासन समितिका सभापति रामहरि खतिवडा पदबाट राजीनामा दिने तयारी गरेका छन् ।
उनी निकट स्रोतका अनुसार, खतिवडाले मंगलबारको प्रतिनिधि सभा बैठकमा बोल्ने समय लिएकाले त्यही अवसरमा समितिको सभापति पदबाट राजीनामा घोषणा गर्न सक्ने अनुमान गरिएको छ। यसअघि उक्त प्रावधानमा भएको अनियमितताबारे गठित संसदीय छानबिन समितिले खतिवडालाई नैतिक जिम्मेवार ठहर गरेको थियो।
परिणामस्वरूप, विपक्षी मात्र नभई सत्तापक्षका सांसदहरूबाट समेत उनको राजीनामाको माग बढ्दै आएको छ।
यसैबीच, ‘सङ्घीय निजामती सेवा विधेयकको प्रतिवेदनमा भएको त्रुटि छानबिन विशेष समिति’ का सुझाव कार्यान्वयनबारे छलफल गर्न सभामुखले मंगलबारको बैठकपछि सिंहदरबारमा प्रमुख पाँच दलका प्रमुख सचेतकहरूसँग बैठक गर्ने तयारी गरेका छन्।
प्रतिक्रिया