काठमाडौं । यस वर्षको कक्षा १२ को परीक्षा नतिजा सार्वजनिक गरिएको छ।
राष्ट्रिय परीक्षा बोर्डको बैठकले निर्णय गरेसँगै नतिजा आज सार्वजनिक गरिएको हो। २०७९ साल वैशाख २१ गतेदेखि सुरु भएको परीक्षामा ५ लाख ११ हजार ५ सय २५ जना विद्यार्थी सहभागी भएका थिए। तीमध्ये नियमिततर्फ ३ लाख ९५ हजार र आंशिकतर्फ १ लाख १५ हजार परीक्षार्थी थिए।
बोर्डले परीक्षा सञ्चालनका लागि देशभर १ हजार ५ सय ९१ केन्द्र तोकेको थियो। विद्यार्थीहरू ५ हजार २ सय २ वटा विद्यालयबाट सहभागी भएका थिए। यसपटक विदेशस्थित जापानको एभरेस्ट स्कुलबाट समेत ३८ जना परीक्षार्थीले परीक्षा दिएका थिए।
जिल्लागत हेर्दा मनाङबाट ४५ जना र काठमाडौंबाट सबैभन्दा धेरै ६८ हजार विद्यार्थी सहभागी भएका थिए। काठमाडौंमा मात्रै १ सय ६२ परीक्षा केन्द्र सञ्चालन गरिएको थियो भने मनाङ र मुस्ताङमा १/१ परीक्षा केन्द्र तोकिएको थियो। यसअघिको तालिकाअनुसार वैशाख ११ बाट परीक्षा सुरु हुने भए पनि नेपाल शिक्षक महासंघको शैक्षिक हडताल र काठमाडौं केन्द्रित आन्दोलनका कारण परीक्षा १० दिन पछि सरेको थियो।
परीक्षा जेठ २ गते सम्पन्न भएको हो। त्यसपछि उत्तरपुस्तिका मूल्यांकन लगायतका काम तीव्र गतिमा सम्पन्न गरिएका थिए।
यसरी हेर्नुहोस् नतिजा
नतिजा सार्वजनिक भएसँगै धेरै विद्यार्थी र अभिभावकहरू नतिजा हेर्ने तरिकाबारे अन्योलमा छन्। यसबारे बोर्डले जानकारी दिएको छ। नतिजा निम्न माध्यमबाट हेर्न सकिन्छ:
🔹 वेबसाइटमार्फत:
– राष्ट्रिय परीक्षा बोर्डको वेबसाइट: neb.gov.np
– नेपाल टेलिकमको वेबसाइट: neb.ntc.net.np
🔹 एसएमएस सेवामार्फत:
NEB को सिम्बोल नम्बर टाइप गरी नेपाल टेलिकमको १६०० नम्बरमा SMS पठाउँदा नतिजा प्राप्त गर्न सकिन्छ।
🔹 आईभीआर सेवामार्फत:
नेपाल टेलिकमको १६०१ नम्बरमा फोन गरी निर्देशनअनुसार नतिजा सुन्न सकिन्छ।
🔹 यूएसएसडी सेवामार्फत:
मोबाइलबाट *1601# डायल गरी निर्देशानुसार नतिजा हेर्न सकिनेछ।
प्रतिक्रिया