अलास्काको तटमा ७.३ म्याग्निच्युडको भूकम्प

काठमाडौं । बुधबार अमेरिकी राज्य अलास्काको तटवर्ती क्षेत्रमा ७.३ म्याग्निच्युडको शक्तिशाली भूकम्प गएको छ।

अमेरिकी भूगर्भीय सर्वेक्षण (यूएसजिएस) का अनुसार, भूकम्पको झट्कापछि तत्कालै सुनामी चेतावनी जारी गरिए पनि केही समयपछि सल्लाहमा झारिएको थियो र अन्ततः पूर्ण रूपमा खारेज गरिएको हो। स्थानीय समयअनुसार दिउँसो १२ः३७ बजे (२०ः३७ GMT) मा गएको भूकम्पको केन्द्रविन्दु स्यान्ड पोइन्ट टापुबाट करिब ८७ किलोमिटर दक्षिणमा र करिब १२.५ माइल (२० किमी) गहिराइमा रहेको बताइएको छ।

प्रारम्भमा दक्षिणी अलास्का तथा अलास्का प्रायद्वीपभरि सुनामीको सम्भावना औँल्याउँदै चेतावनी जारी गरिएको थियो। तर राष्ट्रिय सुनामी चेतावनी केन्द्र (NTWC) ले भूकम्पपछिका अवस्थाको मूल्याङ्कन गरेपछि करिब दुई घण्टापछि चेतावनीलाई खारेज गरेको जानकारी दिएको छ। “अलास्काका तटीय क्षेत्रहरूका लागि जारी गरिएको सुनामी सल्लाह अब हटाइएको छ,” एनटिडब्लुसीको वक्तव्यमा भनिएको छ।

भूकम्पपछि परकम्पहरूको एक श्रृंखला आएको पनि युएसजिएसले जनाएको छ। तीमध्ये सबैभन्दा ठूलो ५.२ म्याग्निच्युडको मापन गरिएको हो। यद्यपि, सुनामीसम्बन्धी चेतावनीहरू केवल अलास्काको तटवर्ती क्षेत्रहरूमा सीमित रहेका थिए र अन्य क्षेत्रहरूमा असर परेको थिएन।

स्यान्ड पोइन्टमा अधिकतम ६.१ सेन्टिमिटर (०.२ फिट) उचाइको सानो सुनामीको अवलोकन गरिएको थियो। यद्यपि, अधिकारीहरूले स्थानीय बासिन्दाहरूलाई सावधानी अपनाउन र सुरक्षित क्षेत्र घोषणा नहुञ्जेलसम्म खतराग्रस्त क्षेत्रहरूमा नफर्कन आग्रह गरेका छन्।

अलास्का, भूकम्पीय रूपमा अत्यन्तै सक्रिय प्रशान्त रिङ अफ फायर क्षेत्रमा पर्ने भएकाले यहाँ यस्ता गतिविधि बारम्बार देखिन्छन्। सन् १९६४ मा अलास्कामै ९.२ म्याग्निच्युडको भूकम्प गएको थियो, जुन अहिलेसम्म उत्तर अमेरिकामा मापन गरिएको सबैभन्दा शक्तिशाली भूकम्प हो। त्यस भूकम्पले एन्कोरेज सहरमा ठूलो विनाश ल्याएको थियो र सुनामीको कारण दर्जनौँको ज्यान गएको थियो। साथै, अरबौं रुपैयाँ बराबरको भौतिक सम्पत्ति नोक्सान भएको थियो।

यसअघि पनि सन् २०२३ जुलाईमा अलास्का प्रायद्वीपमा ७.२ म्याग्निच्युडको भूकम्प गएको थियो, तर त्यसपटक गम्भीर क्षति नदेखिएको समाचार संस्थाहरूले जनाएका थिए।