आजको मौसमः केही क्षेत्रमा भारी बर्षा र बाढीको जोखिम

काठमाडौं । देशभर अहिले सक्रिय रहेको मनसुनी प्रणालीका कारण अधिकांश स्थानमा बदली र वर्षाको क्रम जारी रहेको मौसम पूर्वानुमान महाशाखाले जनाएको छ।

महाशाखाका अनुसार मनसुनको न्यून चापीय रेखा पश्चिम क्षेत्रमा सरदर स्थानकै आसपास र पूर्वी भूभागमा सामान्यतया उत्तरतर्फ सरेको छ। यसको प्रभावले कोशी, गण्डकी, कर्णाली, सुदूरपश्चिम तथा बागमती प्रदेशका केही स्थानहरूमा हल्कादेखि मध्यम वर्षा भइरहेको छ।

आज दिउँसो अधिकांश प्रदेशहरूमा आंशिकदेखि सामान्य बदली रहनेछ। कोशी, मधेस, बागमती, गण्डकी र लुम्बिनी प्रदेशका धेरैजसो स्थानहरूमा चट्याङसहित हल्कादेखि मध्यम वर्षाको सम्भावना छ भने बाँकी प्रदेशका केही स्थानमा पनि वर्षा हुन सक्ने महाशाखाले जनाएको छ।

कोशी प्रदेशका केही स्थानहरूमा भारीदेखि अति भारी वर्षाको सम्भावना रहेको छ। साथै मधेस, बागमती, गण्डकी र लुम्बिनी प्रदेशका एक–दुई स्थानमा पनि भारी वर्षाको सम्भावना रहेको जनाइएको छ। उच्च पहाडी तथा हिमाली क्षेत्रमा हल्कादेखि मध्यम वर्षासहित हिमपात हुन सक्ने सम्भावना पनि गरिएको छ। त्यस्तै, कोशी र मधेस प्रदेशका तराई क्षेत्रमा स्थानीय हावाहुरीको सम्भावना रहेको छ।

रातिको समयमा पनि देशभर आंशिकदेखि सामान्य बदली रहनेछ। कोशी, मधेस र सुदूरपश्चिम प्रदेशका साथै पहाडी भूभागका केही स्थानहरूमा चट्याङसहित हल्कादेखि मध्यम वर्षा हुने सम्भावना छ। यीमध्ये कोशी, मधेस र सुदूरपश्चिम प्रदेशका एक–दुई स्थानमा भारी वर्षा हुन सक्ने अनुमान गरिएको छ।

भारी वर्षाका कारण कोशी, मधेस, बागमती, गण्डकी र लुम्बिनी प्रदेशका केही भूभागमा भूक्षय, बाढी, पहिरो तथा गेग्रान बहावको जोखिम रहेकोले सतर्कता अपनाउन मौसम विभागले आग्रह गरेको छ।