देशभर मनसुन सक्रिय : केही प्रदेशमा भारी वर्षाको सम्भावना

काठमाडौं । हाल देशभर मनसुनी प्रणालीको प्रभाव सक्रिय देखिएको छ।

मौसम पूर्वानुमान महाशाखाका अनुसार मनसुनजन्य न्यून चापीय रेखा औसत स्थानको आसपास रहेकोले देशका अधिकांश भागमा आंशिकदेखि सामान्य बदलीको अवस्था छ। गण्डकी, लुम्बिनी, कर्णाली र सुदूरपश्चिम प्रदेशलगायत पहाडी भूभागहरूमा आंशिकदेखि सामान्य बदली रहँदा अन्य क्षेत्रमा आंशिक बदलीदेखि मौसम सामान्यतया सफा छ।

कोशी, बागमती, गण्डकी, लुम्बिनी र कर्णाली प्रदेशका केही स्थानहरूमा हाल चट्याङसहित हल्कादेखि मध्यम वर्षा भइरहेको छ। आज दिउँसो देशभर आंशिकदेखि सामान्य बदली रहनेछ। विशेषगरी पहाडी भूभागका धेरै स्थानहरूमा र बाँकी भूभागका केही स्थानहरूमा चट्याङसहित हल्कादेखि मध्यम वर्षाको सम्भावना रहेको महाशाखाले जनाएको छ।

साथै, गण्डकी, कर्णाली र सुदूरपश्चिम प्रदेशका एक–दुई स्थानहरूमा भारी वर्षाको सम्भावना समेत रहेकोले सतर्क रहन अनुरोध गरिएको छ। उच्च पहाडी र हिमाली क्षेत्रका केही स्थानहरूमा हिमपातसमेत हुन सक्ने अनुमान छ। आज राति पनि देशभर आंशिकदेखि सामान्य बदली रहनेछ।

कोशी, गण्डकी, लुम्बिनी, कर्णाली र सुदूरपश्चिम प्रदेशका पहाडी क्षेत्रहरूमा हल्कादेखि मध्यम वर्षा हुन सक्ने सम्भावना छ भने, कोशी, गण्डकी र लुम्बिनीका एक–दुई स्थानमा भारी वर्षा हुन सक्ने देखिएको छ। भारी वर्षाका कारण केही स्थानहरूमा भूक्षय, बाढी, पहिरो तथा गेग्रान बहावको जोखिम रहेकोले प्रभावित क्षेत्रका नागरिकहरूलाई आवश्यक सतर्कता अपनाउन मौसम पूर्वानुमान महाशाखाले आग्रह गरेको छ।

यात्रुहरू, किसानहरू तथा निर्माण क्षेत्रका सरोकारवालाहरूले विशेष सावधानी अपनाउनुपर्ने आवश्यकता औंल्याइएको छ।