एजेन्सी । संयुक्त राज्य अमेरिकाको मध्य टेक्सासमा आएको भीषण बाढीले कम्तीमा ७८ जनाको ज्यान लिएको छ भने ४१ जना अझै पनि बेपत्ता छन्।
मृतकमध्ये ६८ जना केअर काउन्टीका बासिन्दा थिए, जसमा २८ बालबालिका परेका छन्। यस काउन्टीमा रहेको एक लोकप्रिय क्रिश्चियन बालिका शिविर ‘क्याम्प मिस्टिक’ नदीको किनारमै रहेकाले पूर्ण रूपमा बाढीले डुबाएको थियो। क्याम्पमा रहेका १० बालिका र एक सल्लाहकार अझै पनि हराइरहेका छन्। घटनाको भयावहता यसैबाट अनुमान गर्न सकिन्छ कि अधिकांश शिविरार्थीहरू सुतिरहेको समयमा जलस्तर केवल ४५ मिनेटमा ८ मिटरले बढेको थियो।
अधिकारिहरूले मृत्युको संख्या अझै बढ्न सक्ने चेतावनी दिएका छन्, विशेषतः आगामी २४–४८ घण्टासम्म थप वर्षाको सम्भावना रहेकाले उद्धार कार्यमा कठिनाइ सिर्जना हुने देखिन्छ। उद्धार टोलीहरू अहिले हिलो र भग्नावशेषमा फसेका मानिसहरूको खोजी गरिरहेका छन्, जहाँ विषालु सर्पहरू पनि चुनौतीका रूपमा देखा परेका छन्।
बाढीको तीन दिनपछि, टेक्सासको हालको इतिहासमा यो सबैभन्दा ठूलो खोजी तथा उद्धार प्रयास मानिएको छ, जुन अहिले शव संकलन अभियानमा रूपान्तरित हुँदै गएको छ। केअर काउन्टीमा फेला परेका १८ वयस्क र १० बालबालिकाको अझै औपचारिक पहिचान हुन बाँकी छ।
टेक्सासका गभर्नर ग्रेग एबोटले आइतबार उद्धार टोलीहरूलाई हरेक बेपत्ता व्यक्तिको खोजीमा कुनै कसर बाँकी नराख्न निर्देशन दिएका छन्। खोज तथा उद्धारको केन्द्र अहिले ग्वाडालुपे नदी किनारमा रहेको शिविरमै केन्द्रित गरिएको छ, जहाँ सबैभन्दा बढी क्षति पुगेको छ।
प्रतिक्रिया