एजेन्सी । स्पेनिस जायन्ट रियल मड्रिडले फिफा क्लब विश्वकप फुटबलको सेमिफाइनलमा स्थान बनाएको छ।
सोमबार राति सम्पन्न खेलमा जर्मन क्लब बोरुसिया डर्टमुन्डलाई ३–२ ले पराजित गर्दै रियलले अन्तिम चारमा प्रवेश गरेको हो। रियल मड्रिडले खेलको सुरुवातदेखि नै आक्रामक खेल प्रस्तुत गर्यो। १०औं मिनेटमा गोंजालो गार्सियाले गोल गर्दै सुरुआती अग्रता दिलाए भने, २०औं मिनेटमा फ्रान गार्सियाले थप गोल गर्दै अग्रता दोब्बर बनाए।
पहिलो हाफमा २–० को अवस्थामा पुगेको रियल मड्रिड सहज जिततर्फ अघि बढिरहेको देखिएको थियो। दोस्रो हाफको इन्जुरी समय प्रवेश गर्नेबित्तिकै खेलमा नयाँ मोड आयो। इन्जुरी समयको दोस्रो मिनेटमा डर्टमुन्डका मेक्सिमिलियन बेइयरले गोल गर्दै अन्तर घटाए। तर त्यसको दुई मिनेटमै रियलका सुपरस्टार किलियन एमबाप्पेले उत्कृष्ट गोल गर्दै टिमको अग्रता फेरि फराकिलो बनाए।
इन्जुरी समयको पाँचौं मिनेटमा रियलका डेयान हुयिसेनले रातो कार्ड पाउँदै मैदान छाडेपछि रियल १० खेलाडीमा सीमित रह्यो। त्यसको तीन मिनेटपछि सर्हो गुइरासीले पेनाल्टीमार्फत डर्टमुन्डका लागि दोस्रो गोल फर्काए तर समय अभावले खेल बराबरीमा पुग्न सकेन।
अब सेमिफाइनलमा रियल मड्रिडको प्रतिद्वन्द्वी फ्रेन्च क्लब पेरिस सेन्ट-जर्मेन (पीएसजी) हुनेछ। दुई युरोपेली दिग्गजबीचको यो भिडन्त क्लब विश्वकपको सबैभन्दा बहुप्रतीक्षित खेलमध्ये एक बन्ने निश्चित छ।
प्रतिक्रिया