काठमाडौं । नेपाली राष्ट्रिय टोलीका लेगस्पिनर सन्दीप लामिछाने नेपाल प्रिमियर लिग (एनपीएल) क्रिकेटको दोस्रो संस्करणमा पनि विराटनगर किङ्सबाटै मैदान उत्रिने भएका छन् ।
विराटनगर फ्रेन्चाइजले शनिबार सामाजिक सञ्जालमार्फत सन्दीपलाई ‘मार्की खेलाडी’को रूपमा टिममा रिटेन गरिएको जानकारी गराएको हो । सन्दीप पहिलो संस्करणमा पनि विराटनगरको कप्तान थिए । यद्यपि, टिमको प्रदर्शन भने सन्तोषजनक देखिएन । ८ टिम सहभागी उक्त सिजनमा विराटनगरले ७ खेलमध्ये २ खेलमा मात्र जित निकाल्दै सातौं स्थानमा सन्तोष मान्नु परेको थियो ।
गत सिजन विराटनगरबाट लोकेश बम, बसिर अहमद, कमल खत्री, दिपक बोहरा, सुवास भण्डारी, अनिल खरेल, जितेन्द्र मुखिया, राजेश पुलामी मगर, प्रतिश जीसी र नरेन भट्ट मैदान उत्रिएका थिए । तीमध्ये ६ खेलाडीलाई यसपटक पुनः रिटेन गरिने तयारी छ ।
एनपीएलको नियमअनुसार फ्रेन्चाइजहरूले एक जना मार्की खेलाडीसहित कुल ७ खेलाडीलाई रिटेन गर्न पाउने व्यवस्था छ । बाँकी टिम निर्माणका लागि आगामी अगस्टमा ‘मिनी अक्सन’ आयोजना हुने तय भएको छ ।
सन्दीपको पुनरागमनसँगै विराटनगर किङ्स यसपटक बलियो उपस्थितिका साथ पुनरागमन गर्ने तयारीमा देखिएको छ ।
प्रतिक्रिया