काठमाडौं । एएफसी महिला एसियन कप छनोटको समूह एफ अन्तर्गतको अन्तिम खेलमा आज नेपाल र उज्बेकिस्तानबीच कडा प्रतिस्पर्धा हुँदैछ ।
तास्केन्तस्थित मिल्ली स्टेडियममा नेपाली समय अनुसार राति ९:१५ बजे सुरु हुने खेल समूह विजेता बन्ने तथा आगामी वर्ष अष्ट्रेलियामा हुने महिला एसियन कपमा स्थान सुरक्षित गर्ने निर्णायक मौका हुनेछ । समूह चरणमा दुवै टोली अपराजित छन् । नेपालले लाओसलाई ९–० र श्रीलंकालाई ८–० ले हराएको छ भने, उज्बेकिस्तानले श्रीलंकालाई १०–० र लाओसलाई ७–० को फराकिलो जित दर्ता गरेको छ । दुवैले समान ६ अंक, १७ गोल र गोलअन्तर बनाएका छन् ।
अझ रोचक त के छ भने— दुवैले अहिलेसम्म एकपटक पनि गोल खानु परेको छैन । यी तथ्यांकले स्पष्ट देखाउँछ कि आजको खेल बराबरीमा सकिएमा नतिजा पेनाल्टी सुटआउटमार्फत टुंग्याइनेछ । प्रतियोगिता नियम अनुसार यस्तो अवस्थामा टाईब्रेकरको सहारा लिइनेछ ।
नेपालका लागि यो खेल विशेष महत्वको छ । यदि नेपाल विजयी हुन्छ भने, २६ वर्षपछि (पछिल्लो पटक सन् १९९९ मा सहभागी) महिला एसियन कपमा पुन: सहभागिता जनाउने ऐतिहासिक अवसर हुनेछ । यता, उज्बेकिस्तानले सन् २००३ पछि एसियन कप खेलेको छैन ।
साथै, यो प्रतियोगिता फिफा महिला विश्वकप र ओलम्पिक फुटबलको छनोट प्रक्रिया समेत भएकाले आजको भिडन्त दुवै टोलीको भविष्य निर्धारण गर्ने चरणमा पुगेको छ ।
प्रतिक्रिया