काठमाडौं । नेपाल प्रिमियर लिग (एनपीएल) को साविक विजेता टोली जनकपुर बोल्ट्सले दोस्रो संस्करणका लागि रिटेन गरिएका खेलाडीहरूको नाम सार्वजनिक गरेको छ।
आज सामाजिक सञ्जालमार्फत जनकपुरले सात जना खेलाडीलाई कायम राखिएको जानकारी दिएको हो। रिटेन सूचीमा राष्ट्रिय टोलीका ओपनर तथा मार्की खेलाडी आसिफ शेख प्रमुख छन्। त्यस्तै, अघिल्लो संस्करणमा कप्तानी सम्हालेका अनिल शाह पनि टोलीमै रहने भएका छन्। अन्य रिटेन खेलाडीमा शुभ कंसाकार, किशोर महतो, ललित राजवंशी, तुलबहादुर थापा मगर र रुपेश सिंह रहेका छन्।
यसअघि काठमाण्डौ गोर्खाज, लुम्बिनी लायन्स, सुदूरपश्चिम रोयल्स, चितवन राइनोज र कर्णाली याक्सले पनि रिटेन तथा रिलिज खेलाडीहरूको सूची सार्वजनिक गरिसकेका छन्। एनपीएलको नियमअनुसार, प्रत्येक टोलीले मार्की खेलाडीबाहेक अधिकतम ६ खेलाडीलाई रिटेन गर्न पाउने व्यवस्था छ।
पहिलो संस्करणको फाइनलमा सुदूरपश्चिम रोयल्सलाई हराउँदै उपाधि जितेको जनकपुर बोल्ट्स यसपटक पनि उपाधि रक्षा गर्ने लक्ष्यमा छ।
प्रतिक्रिया