देशभर मनसुनको सक्रियता: केही स्थानमा भारी वर्षाको सम्भावना, सतर्क रहन अनुरोध

काठमाडौं । देशभर हाल मनसुनी वायुको प्रभाव सक्रिय रहेको मौसम पूर्वानुमान महाशाखाले जानकारी दिएको छ।

मनसुनको न्यून चापीय रेखा सरदर स्थानको आसपास रहँदा मौसम बदलिँदो देखिएको छ। यसको प्रभावस्वरूप सुदूरपश्चिम प्रदेशका पहाडी क्षेत्रहरूसहित अधिकांश प्रदेशहरूमा आंशिकदेखि सामान्य बदली रहेको छ। कोशी, मधेस, बागमती, गण्डकी र लुम्बिनी प्रदेशका केही स्थानहरूमा र कर्णाली प्रदेशका एक–दुई स्थानमा चट्याङसहित हल्कादेखि मध्यम वर्षा भइरहेको छ।

दिउँसोको समयभर देशभर आंशिकदेखि सामान्य बदली रहनेछ। कोशी, बागमती, गण्डकी, लुम्बिनी, सुदूरपश्चिम प्रदेश र पहाडी भूभागमा वर्षा व्यापक हुने देखिएको छ भने अन्य भूभागमा पनि केही स्थानहरूमा चट्याङसहित हल्कादेखि मध्यम वर्षाको सम्भावना रहेको छ।

यससँगै, कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका पहाडी क्षेत्रमा एक–दुई स्थानमा भारी वर्षा हुने सम्भावना पनि रहेको छ। उच्च पहाडी तथा हिमाली क्षेत्रका केही भागहरूमा हल्कादेखि मध्यम वर्षासँगै हिमपातको पनि सम्भावना छ।

रातिको समयमा पनि मौसम समान रूपमा बदली रहनेछ। पहाडी क्षेत्रमा केही स्थानहरूमा र अन्यत्र थोरै ठाउँहरूमा चट्याङसहित हल्कादेखि मध्यम वर्षा सम्भावित छ। कोशी, गण्डकी र सुदूरपश्चिम प्रदेशका एक–दुई स्थानमा भारी वर्षा हुने सम्भावना पनि रहेको छ।

मौसम पूर्वानुमान महाशाखाले भारी वर्षाको सम्भावना रहेकाले पहाडी भूभागमा भूक्षय, बाढी, पहिरो तथा गेग्रान बहावको जोखिम हुन सक्ने भन्दै आवश्यक सतर्कता अपनाउन अनुरोध गरेको छ।