पाल्पा । पाल्पाको पूर्वखोला गाउँपालिका–५ स्थित वीरकोटको आर्यभञ्ज्याङ–रामपुर कच्ची सडकखण्डमा जिप दुर्घटना हुँदा दुई जनाको मृत्यु भएको छ भने एक जना घाइते भएका छन्।
हिजो बेलुका आर्यभञ्ज्याङबाट रामपुरतर्फ जाँदै गरेको लु १ च ६७५६ नम्बरको जिप अनियन्त्रित भई दुर्घटनामा परेको जिल्ला प्रहरी कार्यालय पाल्पाका प्रहरी नायब उपरीक्षक (डीएसपी) सुनिल मल्लले जानकारी दिए ।
दुर्घटनामा जिपधनी बगनासकाली गाउँपालिका–१, गाप्टुङ स्थायी घर भई हाल बुटवल उपमहानगरपालिका–११ मझुवा बस्ने ४६ वर्षीय विनोद ढुङ्गाना र अर्का एकजना अन्दाजी ४५ वर्षीय पुरुषको ज्यान गएको हो। ढुङ्गानाको लुम्बिनी मेडिकल कलेज, प्रभासमा र अर्का व्यक्तिको मिसन अस्पताल, तानसेनमा उपचारका क्रममा मृत्यु भएको प्रहरीले जनाएको छ।
दुर्घटनामा जिपका चालक बुटवल उपमहानगरपालिका–११ का ३० वर्षीय राजु खड्का घाइते भएका छन्। उनी हाल लुम्बिनी मेडिकल कलेज, प्रभासमा उपचाररत छन्।
दुर्घटनाको कारण खुल्न नसकेको र आवश्यक अनुसन्धान भइरहेको प्रहरीले जनाएको छ।
प्रतिक्रिया