काठमाडौं । देशभर मनसुनी हावा सक्रिय भइरहेकाले विभिन्न क्षेत्रहरूमा वर्षा सुरु भएको छ ।
जल तथा मौसम विज्ञान विभागअन्तर्गत मौसम पूर्वानुमान महाशाखाले मनसुनी प्रणालीको प्रभावका कारण देशका थुप्रै स्थानमा मध्यमदेखि भारी वर्षा भइरहेको जानकारी दिएको छ। महाशाखाका मौसमविद् गोविन्द झाका अनुसार बंगालको खाडीबाट जलवाष्पयुक्त हावा प्रवेश गरिरहेकाले वर्षा गराउने प्रणाली सक्रिय बनेको हो। उनका अनुसार पश्चिमी वायु र स्थानीय वायुले पनि देशको पश्चिम र मध्य भागमा थप प्रभाव पारेको छ।
हाल कोशी प्रदेशको इलाम, बागमती प्रदेशको काभ्रे, सिन्धुपाल्चोक, नुवाकोट, काठमाडौं र चितवन, लुम्बिनी प्रदेशको प्युठान र रोल्पा तथा कर्णाली प्रदेशको सुर्खेत आसपासमा मेघगर्जन र चट्याङसहित हल्कादेखि मध्यम वर्षा भइरहेको छ। इलाम र बर्दिया आसपास भने भारी वर्षा भइरहेको महाशाखाको भनाइ छ।
शनिबारसम्म काठमाडौं उपत्यकासहित धेरै ठाउँमा वर्षा जारी रहने सम्भावना रहेको छ। विशेषगरी कोशी, बागमती, गण्डकी र लुम्बिनी प्रदेशका केही स्थानमा भारी वर्षाको सम्भावना रहेको विभागले जनाएको छ। यस्तै, उच्च पहाडी तथा हिमाली भू–भागका केही स्थानमा हल्का वर्षा वा हिमपात पनि हुनसक्ने उल्लेख गरिएको छ।
महाशाखाले वर्षाले दैनिक जनजीवन, कृषि, स्वास्थ्य, सडक तथा हवाई यातायातमा असर पार्न सक्ने भन्दै आवश्यक सतर्कता र तयारी गर्न नागरिकलाई अनुरोध गरेको छ।
प्रतिक्रिया