काठमाडौं । अमेरिकाको क्यालिफोर्निया राज्यस्थित लस एन्जलस शहरमा रात्रिकालीन कर्फ्यु घोषणा गरिएको छ।
अवैध आप्रवासीहरूमाथि गरिएको छापा बिरुद्धको विरोध प्रदर्शन हिंसात्मक बन्दा मेयर करेन बासले शहरका केही भागमा कर्फ्यु लागू गर्नुभएको बीबीसीले जनाएको छ। स्थानीय समयअनुसार राति ८ बजेदेखि बिहान ६ बजेसम्म लागू हुने कर्फ्युको अवज्ञा गर्नेहरूलाई पक्राउ गरिने चेतावनी दिइएको छ।
लस एन्जलस प्रहरी प्रमुख जिम म्याकडोनेलका अनुसार नागरिकको जीवन रक्षा र सार्वजनिक सम्पत्तिको सुरक्षाका लागि कर्फ्यु आवश्यक भएको हो। प्रदर्शनका क्रममा हालसम्म झन्डै दुई सय जना पक्राउ परिसकेको प्रहरीले जनाएको छ। यहीबीच, टेलिभिजन सम्बोधनमार्फत क्यालिफोर्नियाका गभर्नर गेभिन न्युसमले राष्ट्रपति डोनाल्ड ट्रम्पमाथि कडा आलोचना गर्नुभएको छ। उहाँले राष्ट्रपतिको भड्काउने अभिव्यक्ति र शक्ति दुरुपयोगले स्थिति बिग्रिएको बताउनुभयो।
यसअघि राष्ट्रपति ट्रम्पले प्रदर्शनलाई सार्वजनिक सुरक्षामाथिको हमला भन्दै थप सैनिक परिचालनको चेतावनी दिएका थिए। लस एन्जलसबाट सुरू भएको प्रदर्शन अहिले अमेरिकाका अन्य प्रमुख शहरहरूमा समेत फैलिएको छ। न्युयोर्कमा समेत दर्जनौँ प्रदर्शनकारी पक्राउ परेका समाचार आएका छन्।
यस घटनाले अमेरिकामा पुनः जातीय, सामाजिक र प्रशासनिक व्यवस्थामाथि गम्भीर बहसको वातावरण सिर्जना गरेको छ।
प्रतिक्रिया