काठमाडौं । केही दिनदेखि आन्दोलनरत यातायात व्यवसायीहरूले आफ्नो आन्दोलन स्थगन गरेपछि गण्डकी प्रदेशमा सार्वजनिक यातायात सेवा पुनः सञ्चालनमा आएको छ।
मंगलबार साँझ गण्डकी प्रदेश सरकारले राइड सेयरिङसम्बन्धी नियमावलीलाई एक महिनाका लागि स्थगित गर्ने निर्णय गरेपछि व्यवसायीहरू वार्तामा सहमत भएका हुन्। त्यसैको परिणामस्वरूप उनीहरूले तत्काल प्रभावबाट प्रदर्शन फिर्ता लिने घोषणा गरेका छन्।
यातायात व्यवसायी महासंघ र प्रदेश सरकारबीच मंगलबार भएको वार्ता सकारात्मक बनेपछि समस्या समाधानको बाटो खुलेको हो। आन्दोलनका कारण प्रभावित यात्रुहरूका लागि यो राहतको खबर बनेको छ।
गण्डकी प्रदेश सरकारले राइड सेयरिङ एपमार्फत सञ्चालन हुने सवारी सेवाका लागि नयाँ नियमावली ल्याएपछि व्यवसायीहरू आन्दोलित भएका थिए। उनीहरूले नियमावलीलाई आफूहरूका हकहितविपरीत भन्दै तत्काल खारेजको माग गर्दै आन्दोलन चर्काउँदै आएका थिए।
तर, सरकार र व्यवसायीबीच संवादमार्फत सहमति जुटेपछि हाललाई वातावरण सहज बनेको देखिएको छ। अब आगामी एक महिनाभित्र नियमावलीमा पुनर्विचार वा संशोधन हुने सम्भावना छ।
प्रतिक्रिया