संसद् बैठक सुरु नहुँदै फेरि स्थगित, भोलि दिउँसो १ बजे बस्ने

काठमाडौं । प्रतिनिधिसभाको आज (मङ्गलबार) बिहान ११ बजेका लागि तय गरिएको बैठक सुरु नै नहुँदै स्थगित गरिएको छ।

प्रारम्भमा २ बजेसम्मको लागि सारिएको बैठक, फेरि पनि सञ्चालन हुन नसकेपछि संसद् सचिवालयले बुधबार दिउँसो १ बजेका लागि सारिएको जानकारी दिएको छ। संसद् बैठक स्थगित हुनुको कारण हाल भिजिट भिसा प्रकरणलाई लिएर उत्पन्न विवाद हो। यस प्रकरणमा गृहमन्त्री रमेश लेखक मुछिएको भन्दै विपक्षी दलहरू—नेकपा माओवादी केन्द्र, राष्ट्रिय स्वतन्त्र पार्टी, र नेकपा एकीकृत समाजवादी पार्टी—ले उनको राजीनामा माग्दै सदन अवरुद्ध गरेका छन्।

लगातारको अवरोधका कारण संसद् बैठक सूचना टाँस्दै स्थगन गर्दै आएको छ।