रेनी स्लेगर्सको प्रभावशाली नेतृत्वमा रहेको आर्सनल महिला फुटबल टोलीले १८ वर्षपछिको प्रतीक्षा तोड्दै युरोपेली च्याम्पियन्स लिगको उपाधि आफ्नो पोल्टामा पार्न सफल भएको छ।
शनिबार भएको फाइनल खेलमा आर्सनलले स्पेनको बलियो टोली बार्सिलोनालाई १–० गोल अन्तरले पराजित गर्दै ऐतिहासिक उपाधि जित्यो। निर्णायक गोल खेलको ७४औं मिनेटमा स्टिना ब्ल्याकस्टेनसले गरेकी थिइन्, जुन खेलको एक मात्र र विजयी गोल बन्यो। महिला सुपर लिगको गत सिजनमा तेस्रो स्थानमा रहँदै तीन चरणको कठिन छनोट प्रक्रियाबाट गुज्रिएको आर्सनलले कुल १५ खेल खेलेर उपाधि जित्ने कीर्तिमान समेत बनाएको छ।
पूर्व प्रशिक्षक जोनास आइडेभालको राजीनामापछि अक्टोबरमा टोलीको जिम्मेवारी सम्हालेकी स्लेगर्सले पहिलो ११ खेलसम्म अपराजित यात्रा गर्दै टोलीमा नयाँ ऊर्जा भरिन्। रियल म्याड्रिड र ल्योनविरुद्धको क्वार्टरफाइनल र सेमिफाइनलको पहिलो लेगमा हार बेहोरेको भए पनि, दोस्रो लेगमा उत्कृष्ट पुनरागमन गर्दै आर्सनल ‘कमब्याक क्वीन्स’ भनेर चिनिन सफल भयो।
यो विजयले आर्सनललाई मात्र होइन, सम्पूर्ण महिला फुटबल जगतलाई प्रेरणा दिनेछ।
प्रतिक्रिया