काठमाडौं । आईसीसी महिला टी–२० विश्वकप ग्लोबल छनोट एसियाअन्तर्गतको सुपर थ्री चरणमा आज नेपाल र थाइल्यान्डबीच प्रतिस्पर्धा हुँदैछ।
यद्यपि दुवै टोलीले यसअघि नै ग्लोबल छनोटमा स्थान सुरक्षित गरिसकेका छन्, आजको खेल आत्मबल परीक्षणको रुपमा हेरिएको छ। नेपालले सोमबार संयुक्त अरब इमिरेट्स (यूएई)लाई पाँच विकेटले हराउँदै सुपर–थ्रीको शीर्ष दुईमा स्थान बनाएको थियो। यही नतिजाका आधारमा नेपालले आगामी ग्लोबल छनोटमा सहभागी हुने अवसर सुनिश्चित गरेको हो।
अब नेपालले यही वर्ष आयोजना हुने महिला टी–२० विश्वकप ग्लोबल छनोट खेल्नेछ, जसमा कुल १० टोली प्रतिस्पर्धा गर्नेछन्। सो प्रतियोगिताबाट शीर्ष चार टोलीले सन् २०२६ मा इंग्ल्यान्डमा आयोजना हुने आईसीसी महिला टी–२० विश्वकपमा स्थान बनाउनेछन्।
आजको खेलको नतिजाले छनोट प्रक्रियामा प्रत्यक्ष असर नपारे पनि, टोलीको मनोबल, संयोजन र रणनीतिक अभ्यासको हिसाबले निकै महत्वपूर्ण हुने विश्वास गरिएको छ।
प्रतिक्रिया