एजेन्सी । इजरायलले गाजा क्षेत्रमा गएरातिदेखि तीव्र हवाई आक्रमण सुरु गरेको छ, जसमा हालसम्म कम्तीमा ११४ जनाको ज्यान गएको छ।
हमला अस्पताल, शरणार्थी शिविरलगायत स्थानहरूमा केन्द्रित भएको बताइएको छ। खान युनिसस्थित युरोपेली–गाजा अस्पतालमा मात्रै २८ जनाको मृत्यु भएको पुष्टि भएको छ। अस्पतालमा स्वयंसेवीरूपमा कार्यरत बेलायती सर्जन डा. टम पोटोकारका अनुसार लडाकु विमानबाट एकैपटक ६ वटा बम खसालिएको थियो।
उनले अस्पताल भग्नावशेषमा परिणत भएको भिडियोसमेत सार्वजनिक गरेका छन्। इजरायलले गाजामा १० हप्तादेखि राहत सामग्रीको प्रवेशमा प्रतिबन्ध लगाउँदै आएको छ। यसबीचमा सञ्चारकर्मीलाई समेत क्षेत्र प्रवेश गर्न नदिएको जनाइएको छ। औषधि, खानेपानीलगायत आधारभूत आवश्यकतामा चरम अभाव देखिएको छ।
तर, इजरायली पक्षले भने गाजामा खाद्य संकट नरहेको दाबी गर्दै आएको छ। इजरायल र हमासबीच सन् २०२३ को अक्टोबर ७ बाट सुरु भएको युद्धमा हालसम्म गाजामा झण्डै ५३ हजार मानिसले ज्यान गुमाइसकेका छन्।
प्रतिक्रिया