काठमाडौं । आईसीसी महिला टी–२० विश्वकप एशिया छनोटको आजको खेलमा नेपाल हङकङसँग ७ विकेटले पराजित भएको छ।
वर्षाले छोट्याइएको खेलमा थाइल्यान्डको एआईटी मैदानमा नेपालले दिएको ३० रनको लक्ष्य हङकङले ४ ओभर ३ बलमै ३ विकेट गुमाएर सजिलै भेट्टायो। हङकङका लागि शनजीन शाहजादले नटआउट १५ रनको योगदान दिइन् भने नेपालकी कविता कुँवरले २ विकेट हात पारिन्। टस हारेर ब्याटिङका लागि मैदान उत्रिएको नेपालले ५ ओभरमा ३ विकेट गुमाएर २९ रन बनाएको थियो। नेपालको तर्फबाट सम्झना कुमारी खड्काले सबैभन्दा धेरै १० रन जोडिन्।
हङकङकी मे वे सु तीन विकेट लिँदै बलिङमा चम्किएकी थिइन्। यसअघि, नेपालले बहराइनलाई ९ विकेटले पराजित गर्दै प्रतियोगिताको शानदार सुरुवात गरेको थियो। नेपाल र हङकङबीचको पहिलो भेट वर्षाले रद्द भएको थियो। अब नेपालले बिहीबार फेरि बहराइनसँग खेल्नेछ।
प्रतियोगितामा कुल ९ टिम सहभागी छन्। नेपाल, हङकङ र बहराइन समूह ‘सी’ मा रहेका छन् भने समूह ‘ए’ मा थाइल्यान्ड, कुवेत र भुटान र समूह ‘बी’ मा मलेशिया, कतार र यूएई रहेका छन्। प्रत्येक समूहको शीर्ष टिम ‘सुपर थ्री’ चरणमा पुग्नेछन् र त्यसपछि शीर्ष दुई टोलीले ग्लोबल छनोटमा स्थान बनाउनेछन्।
प्रतिक्रिया