काठमाडौं । भारतको भुवनेश्वरमा जारी साफ यू-१९ च्याम्पियनसिप अन्तर्गत नेपालले आज साँझ घरेलु टोली भारतसँग प्रतिस्पर्धा गर्दैछ।
सेमिफाइनल पुगिसकेका दुवै टिमबीच अब समूह ‘बी’ को शीर्ष स्थान सुनिश्चित गर्ने लक्ष्यसहित भिडन्त हुन लागेको हो। खेल युपियास्थित गोल्डेन जुबिली रङ्गशालामा साँझ ७ः४५ बजे सुरु हुनेछ। नेपाल र भारत यस प्रतियोगिताको इतिहासमा तेस्रो पटक आमनेसामने हुन लागेका हुन्। समूह चरणमा दुबै टिमले श्रीलंकामाथि सहज जित निकालेका छन्—नेपालले श्रीलंकालाई ५–० ले हराएको थियो भने भारतले ८–० को फराकिलो जित दर्ता गर्यो।
समूह ‘ए’ तर्फ पनि सेमिफाइनल पुग्ने अन्तिम टिम आजै तय हुँदैछ। बंगलादेश ४ अंकका साथ पहिल्यै सेमिफाइनल प्रवेश गरिसकेको छ। भुटान र माल्दिभ्सबीच हुने आजको खेल निर्णायक हुनेछ। भुटानले सेमिफाइनलमा पुग्न जित्नैपर्ने छ, जबकि माल्दिभ्स बराबरी गरे पनि अघिल्लो चरणमा पुग्नेछ। यसअघि बंगलादेशले माल्दिभ्ससँग २–२ को बराबरी खेलेको र भुटानलाई ३–० ले हराएको थियो।
नेपालले सन् २०१५ मा पहिलो पटक आयोजित साफ यू-१९ च्याम्पियनसिप जितेको थियो। त्यसपछि सन् २०१७ मा यू-१८ संस्करणको उपाधि पनि हात पार्यो। पछिल्लो संस्करणमा भने नेपाल बंगलादेशसँग फाइनलमा पराजित भएको थियो।
प्रतिक्रिया