नयाँ दिल्ली । भारतका प्रधानमन्त्री नरेन्द्र मोदीले “अपरेशन सिन्दूर”लाई आतङ्कवादविरुद्धको निर्णायक कारबाहीको ऐतिहासिक मिसालको रूपमा प्रस्तुत गरेका छन्।
पाकिस्तानसँगको युद्धविराम सम्झौतापछि राष्ट्रका नाममा सम्बोधन गर्दै मोदीले भारतीय सेनाको साहस, रणनीति र बलिदानको उच्च प्रशंसा गरे। “अपरेशन सिन्दूर”का क्रममा भारतीय सेनाले देखाएको अद्वितीय बहादुरी र आक्रोशपूर्ण जवाफको चर्चा गर्दै प्रधानमन्त्री मोदीले भने, “यो मात्र सैन्य अपरेशन होइन, यो करोडौं भारतीयको भावनाको प्रतिबिम्ब हो।” उनले अपरेशनलाई देशका आमाबुबा, दिदीबहिनी र छोरीचेलीहरूको सिन्दूर र सम्मानसँग जोडेर राष्ट्रवादको भावना उजागर गरे।
पछिल्लो समय जम्मु–कश्मीरको पहलगाममा भएको आतङ्कवादी आक्रमणपछि सम्पूर्ण देश एकजुट भएको स्मरण गर्दै उनले भने, “अप्रिल २२ मा भएको त्यो बर्बर हमला केवल निर्दोष नागरिकमाथिको आक्रमण मात्र थिएन, त्यो भारतको सामाजिक सद्भाव र शान्तिप्रतिको आस्थामाथिको हमला थियो।” उनले भारतीय सेनालाई पूर्ण स्वतन्त्रता दिइएको स्पष्ट पार्दै भने, “सेनाले पाकिस्तानभित्र रहेका आतङ्कवादी अड्डा र तालिम केन्द्रहरूमा लक्षित हमला गर्यो, जसमा १०० भन्दा बढी खतरनाक आतङ्ककारीहरू मारिए।
दशकौँदेखि पाकिस्तानमा लुकेर षड्यन्त्र गरिरहेका आतङ्कवादीहरूलाई भारतले एकै पटक समाप्त गर्यो।” प्रधानमन्त्री मोदीले पाकिस्तानले भारतमाथि मिसाइल र ड्रोन आक्रमणको प्रयास गरेको आरोप लगाए तर भारतको शक्तिशाली वायु रक्षा प्रणालीले ती सबै प्रयास विफल बनाएको पनि बताए। “पाकिस्तानले हमला गर्न खोज्यो, भारतले प्रतिउत्तरस्वरूप यसको आतङ्कवादी मुटुमा प्रहार गर्यो,” उनले दृढताका साथ भने।
उनको दाबी अनुसार अपरेशनको पहिलो तीन दिनमै पाकिस्तान ठूलो क्षतिबाट गुज्रियो, र अन्ततः मे १० मा पाकिस्तानले भारतसँग युद्धविरामको आग्रह गर्यो। प्रधानमन्त्रीले स्पष्ट पारे कि “अपरेशन सिन्दूर” सर्जिकल स्ट्राइक र एयर स्ट्राइकभन्दा पनि गहिरो प्रभाव पार्ने अभियान बनेको छ। यसले भारतको रक्षा नीतिमा नयाँ युगको सुरुवात गरेको र आतङ्कवादविरुद्धको ‘न्यु नर्मल’ स्थापना गरेको मोदीको भनाइ थियो।
“यदि भारतमाथि कुनै प्रकारको आतङ्कवादी हमला भयो भने, त्यसको सटीक, निर्णायक र कठोर जवाफ दिइनेछ,” उनले भने, “भारत अब कुनै पनि किसिमको न्युक्लियर ब्ल्याकमेल सहनेवाला छैन।” अन्त्यमा, प्रधानमन्त्री मोदीले विश्वसमुदायसमक्ष भारतको स्पष्ट सन्देश पुनः दोहोर्याए, “यदि पाकिस्तानसँग वार्ता हुन्छ भने त्यो केवल आतङ्कवादको अन्त्य र पाकिस्तान अधिकृत कश्मीर (पीओके)को सवालमा मात्र हुनेछ।”
प्रतिक्रिया