काठमाडौं । आईसीसी महिला टी–२० विश्वकप छनोट प्रतियोगितामा नेपालले आफ्नो पहिलो खेल हङकङविरुद्ध खेल्ने भएको छ।
नेपाल क्रिकेट संघ (क्यान) ले सोमबार सार्वजनिक गरेको तालिकाअनुसार नेपाल समूह सी मा परेको छ, जहाँ उसका प्रतिस्पर्धी हङकङ र बहराइन रहनेछन्। समूह चरणमा डबल राउण्ड रोविन फर्म्याटमा खेल हुने प्रतियोगितामा प्रत्येक समूहको शीर्ष टोलीले सुपर राउण्डमा स्थान बनाउनेछ।
समग्रमा छनोटमा ९ टोली सहभागी छन्, जसलाई तीनवटा समूहमा विभाजन गरिएको छ। प्रत्येक समूहका विजेताहरूले सुपर राउण्डमा प्रतिस्पर्धा गर्नेछन्, र त्यसपछि उत्कृष्ट दुई टोलीले ग्लोबल क्वालिफायरमा स्थान बनाउनेछन्। मे ९ देखि २० सम्म थाइल्यान्डमा आयोजना हुने उक्त छनोट प्रतियोगितामा नेपालसहित थाइल्यान्ड, हङकङ, बहराइन, भुटान, कुवेत, मलेसिया, कतार र यूएईको सहभागिता रहनेछ।
हाल भारतमा अभ्यासमा रहेको नेपाली महिला क्रिकेट टोली सोही अभ्यास यात्रा सकिएपछि थाइल्यान्ड प्रस्थान गर्नेछ। नेपालको प्रदर्शन यस पटक उत्कृष्ट हुने अपेक्षा गरिएको छ।
प्रतिक्रिया