एजेन्सी । ओडिसास्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) मा अध्ययनरत एक नेपाली विद्यार्थी झुन्डिएको अवस्थामा मृत फेला परेकी छन्।
कम्प्युटर विज्ञान संकायकी प्रथम वर्षकी छात्रा प्रिसा साह बिहीबार साँझ होस्टेलको कोठामा मृत अवस्थामा भेटिएको भारतीय सञ्चारमाध्यमहरूले जनाएका छन्। घटनापछि स्थानीय प्रहरी घटनास्थलमा पुगेर अनुसन्धान प्रारम्भ गरेको छ र शवलाई पोस्टमार्टमका लागि भुवनेश्वरस्थित एम्स अस्पतालमा पठाइएको छ। घटनाबारे मृतकको परिवार तथा नेपालस्थित भारतीय दूतावासलाई पनि जानकारी गराइएको बताइएको छ।
ओडिसा सरकारले घटनाप्रति दुःख व्यक्त गर्दै मृतक छात्राको परिवारप्रति समवेदना जनाएको छ। साथै, घटनाको निष्पक्ष छानबिन गरी दोषीलाई कारबाही गरिने प्रतिबद्धता जनाएको छ। उक्त विश्वविद्यालयमा यसअघि पनि नेपाली विद्यार्थीको मृत्यु भइसकेको थियो। गत फागुन ४ गते नेपाली छात्रा प्रकृति लम्सालको शव होस्टेलमा फेला परेको घटनाले ठूलो चासो र त्रासको वातावरण सिर्जना गरेको थियो।
लगातार दुई नेपाली विद्यार्थीको मृत्युपछि सो विश्वविद्यालयमा अध्ययनरत नेपाली विद्यार्थीहरूबीच चिन्ता र असुरक्षा बढेको देखिन्छ।
प्रतिक्रिया