साफ च्याम्पियनसिप २०२६ सम्म स्थगित

काठमाडौं । दक्षिण एसियाली फुटबल महासंघ (साफ) ले यो वर्ष हुने भनिएको साफ पुरुष च्याम्पियनसिप स्थगित गर्ने निर्णय गरेको छ।

श्रीलंकामा आयोजना हुने भनिएको यस प्रतियोगिताको १५औं संस्करण अब सन् २०२६ मा मात्रै हुने भएको हो। साफले यसपालि ‘होम एन्ड अवे’ ढाँचामा प्रतियोगिता आयोजना गर्ने योजना बनाएको थियो, र त्यसअनुसार तयारी समेत अघि बढाइएको थियो। तर महासंघ, सदस्य राष्ट्रहरू तथा साझेदार संस्था स्पोर्टफाइभबीचको समन्वयमा अझ बढी तयारी आवश्यक ठहर गर्दै प्रतियोगिता सार्ने निर्णय लिइएको साफले स्पष्ट पारेको छ।

साफको भनाइ अनुसार, सबै सरोकारवाला पक्षलाई तयारीका लागि पर्याप्त समय मिलोस् भन्ने उद्देश्यले च्याम्पियनसिप सन् २०२६ सम्मका लागि सारिएको हो।