उच्च विन्दुबाट फर्कियो सुनको भाउ, एकैदिन यतिधेरै घट्यो !

काठमाडौं । नेपाली सुनचाँदी बजारमा बुधबारको दिन उल्लेखनीय मूल्य घटबढ देखिएको छ।

नेपाल सुनचाँदी व्यवसायी महासंघले दिएको जानकारी अनुसार छापावाल सुनको मूल्य बुधबार प्रति तोला १ लाख ९० हजार ४०० रुपैयाँ पुगेको छ, जुन मंगलबारको तुलनामा ७ हजार ५०० रुपैयाँले घटेको हो। मंगलबार यसको मूल्य १ लाख ९७ हजार ९०० रुपैयाँ थियो। त्यसैगरी, १० ग्राम सुनको मूल्य पनि घटेर १ लाख ६३ हजार २३५ रुपैयाँ मा झरेको छ।

चाँदीको मूल्यमा पनि सामान्य गिरावट आएको छ। मंगलबार प्रति तोला १ हजार ९७० रुपैयाँ रहेको चाँदी बुधबार ५ रुपैयाँ घटेर १ हजार ९६५ रुपैयाँ कायम भएको छ।

बजार विश्लेषकहरूका अनुसार अन्तर्राष्ट्रिय बजारको प्रभाव र स्थानीय माग आपूर्तिको अवस्था अनुसार सुनचाँदीको मूल्यमा यस्तो उतारचढाव देखिएको हो।