बारामा टिपर र कार ठोक्किँदा दुईको ज्यान गयो, चालक फरार

बारा । बाराको जितपुर सिमरा उपमहानगरपालिका–१६ भुइँपुल नजिकैको पूर्व–पश्चिम राजमार्गमा शुक्रबार दिउँसो साढे २ बजेतिर भएको सवारी दुर्घटनामा दुई जनाको ज्यान गएको छ।

प्रहरीका अनुसार, प्रदेश २–०३–००१ ख ०६०७ नम्बरको टिपर र बा. ०१–०२५ च ५०७६ नम्बरको कार एकापसमा ठोक्किँदा कारमा सवार दुई जना गम्भीर घाइते भएका थिए। उपचारका लागि निजगढस्थित प्रसूति अस्पताल पुर्‍याइएका दुबैजनालाई चिकित्सकले मृत घोषित गरेका थिए।

मृतकमध्ये एक जनाको सनाखत ४६ वर्षीय नारायण हरि शर्मा रहेको प्रहरीले जनाएको छ। उनी सर्लाहीको बर्हथवा नगरपालिका–१५, हजरियाका बासिन्दा हुन्। कार चालकको सनाखत भने हुन बाँकी छ।

घटनापछि टिपर चालक फरार रहेका छन्। हाल उनको खोजी कार्य भइरहेको जिल्ला प्रहरी कार्यालय बाराले जनाएको छ।