रुपन्देही । नेपाल शिक्षक महासंघको नेतृत्वमा भइरहेको शैक्षिक हडतालको प्रभाव तिलोत्तमा नगरपालिकाको श्री शान्ति नमुना माध्यमिक विद्यालयमा पनि देखिएको छ। विद्यालयले शैक्षिक गतिविधि तथा विद्यार्थी भर्ना कार्यक्रम अनिश्चितकालका लागि स्थगन गरेको जनाएको छ।
प्रधानाध्यापक कुल प्रसाद लामिछानेद्वारा जारी सूचनामा उल्लेख छ, “नेपाल शिक्षक महासंघको माग अनुसार विगतका सम्झौता कार्यान्वयन र नयाँ शिक्षा ऐन लागू गर्न दबाबस्वरूप जारी हडतालका कारण विद्यालय सञ्चालन असम्भव भएकाले सम्पूर्ण कार्यक्रम स्थगित गरिएको छ।”
विद्यालयले विद्यार्थी तथा अभिभावकहरूलाई पर्न गएको असुविधाप्रति क्षमायाचना गर्दै शैक्षिक हडताल समाप्त भएपछि मात्र नयाँ भर्ना प्रक्रिया र अन्य कार्यक्रम पुनः सञ्चालन हुने जानकारी दिएको छ।
विद्यालय प्रशासनले सबैलाई संयमता अपनाई साथ दिन पनि अनुरोध गरेको छ।
प्रतिक्रिया