काठमाडौं। नेकपा (एकीकृत समाजवादी) ले शिक्षा ऐन तुरुन्त पारित गर्न र शिक्षकका जायज मागलाई छिटो वार्ता र संवादमार्फत सम्बोधन गर्न सरकारलाई आग्रह गरेको छ।
पार्टीले शिक्षकको आन्दोलनसँग एक्यबद्धता प्रकट गर्दै, शैक्षिक क्षेत्रका वाजिब मागहरू पूरा गर्न र सरकारले पहिले गरेका सम्झौताहरूलाई कार्यान्वयन गर्नुपर्ने कुरा उठाएको हो। पार्टीका उपमहासचिव रामकुमार भट्टराईद्वारा आइतबार जारी विज्ञप्तीमा भनिएको छ, “यस आन्दोलनले शैक्षिक क्षेत्रमा ठूलो असर पुर्याएको छ, पठनपाठन प्रभावित भएको छ र एसईईको उत्तरपुस्तिका परीक्षणमा पनि समस्या आएको छ। यो राज्यका लागि गम्भीर विषय हो, र हाम्रो पार्टी शिक्षकको आन्दोलनप्रति पूर्ण एक्यबद्धता जनाउँछ।”
नेपाल शिक्षक महासंघको नेतृत्वमा, चैत्र २० देखि देशभरिका शिक्षक र विद्यालयका कर्मचारीहरूले गुणस्तरीय शिक्षा र शिक्षक–कर्मचारी मैत्री विद्यालय शिक्षा ऐन जारी गर्नुपर्ने माग गर्दै काठमाडौंको माइतीघरमा आन्दोलन गर्दै छन्।
प्रतिक्रिया