एजेन्सी । जारी इन्डियन प्रिमियर लिग (आईपीएल) २०२५ मा दिल्ली क्यापिटल्सले आफ्नो अपराजित यात्रा कायम राख्दै शनिबार चेन्नई सुपर किङ्सलाई २५ रनले पराजित गरेको छ।
यो दिल्लीको लगातार तेस्रो जित हो। पहिले ब्याटिङ गर्दै दिल्लीले ६ विकेटको क्षतिमा १८३ रनको चुनौतीपूर्ण स्कोर खडा गर्यो। ओपनर केएल राहुलले ५१ बलमा ७७ रनको उत्कृष्ट पारी खेले, जसमा ६ चौका र ३ छक्का समावेश थिए। अभिषेक पोरेलले ३३ तथा ट्रिस्टन स्टब्सले २४ रनमा अविजित योगदान दिए।
चेन्नईका बलरहरूमध्ये खलील अहमदले सबैभन्दा प्रभावशाली प्रदर्शन गर्दै ४ ओभरमा २५ रन खर्चिएर २ विकेट लिए। जडेजा, नूर अहमद र पथिरानाले समान १-१ विकेट हात पारे। १८४ रनको लक्ष्य पछ्याउन उत्रिएको चेन्नईले ५ विकेट गुमाउँदै १५८ रन मात्र बनाउन सक्यो। विजय शंकरले ६९ रनमा अविजित रहँदा एमएस धोनी २५ रनमै टिके। तर जितसम्म पुग्न सकेनन्।
दिल्लीका बलरहरूमध्ये विपराज निगमले २ विकेट लिए भने मिचेल स्टार्क, मुकेश कुमार र कुलदीप यादवले १-१ विकेट झारे। यस जितसँगै दिल्लीले ३ खेलमा ६ अंक जोड्दै अंक तालिकाको शीर्षस्थानमा उक्लिएको छ।
चेन्नई भने ४ खेलपछि केवल २ अंकका साथ आठौं स्थानमा सीमित रहेको छ।
प्रतिक्रिया