काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङलाई हटाउने सरकारको निर्णयको विरोधमा एकीकृत समाजवादीनिकट विभिन्न जनसंगठनले काठमाडौंमा प्रदर्शन गरेका छन्।
कार्यकारी निर्देशक घिसिङको हटाइमा विरोध जनाउन, एकीकृत समाजवादीनिकट युवा संघ र अनेरास्ववियू लगायतका संगठनका नेताहरुले मंगलबार काठमाडौंको विश्वभाषा क्याम्पस अगाडि विरोध प्रदर्शनको शुरुआत गरेका थिए। प्रदर्शनको क्रममा, प्रदर्शनकर्ताहरुले ऊर्जा, जलस्रोत तथा सिँचाइ मन्त्री दीपक खड्काको पुतला दहन गर्दै सरकारविरुद्ध विभिन्न नाराबाजी पनि गरेका छन्।
कार्यकारी निर्देशक घिसिङलाई हटाउने निर्णयको विरोधमा प्रमुख प्रतिपक्षी दल नेकपा (माओवादी केन्द्र) र राष्ट्रिय स्वतन्त्र पार्टीले आवाज उठाएका छन्। साथै, सत्तारूढ दल नेपाली कांग्रेसका महामन्त्रीगण गगन थापा र विश्वप्रकाश शर्माले पनि सरकारको आलोचना गर्दै सार्वजनिक अभिव्यक्ति दिएका छन्।
सोमबार साँझको मन्त्रिपरिषद्को बैठकमा विद्युत प्राधिकरणका कार्यकारी निर्देशक घिसिङलाई हटाएर हितेन्द्रदेव शाक्यलाई नियुक्त गर्ने निर्णय गरिएको थियो, जसको अहिले चौतर्फी विरोध भइरहेको छ। माओवादी केन्द्र निकट विद्यार्थी संगठन र अन्य समूहहरुले पनि यस निर्णयविरुद्ध प्रदर्शनको तयारी गरिरहेका छन्।
प्रतिक्रिया