कुलमान बर्खास्तीको निर्णयमा शेखर कोइरालाको आपत्ति

काठमाडौं। नेपाल विद्युत् प्राधिकरणका कार्यकारी प्रमुख कुलमान घिसिङलाई पदमुक्त गर्ने सरकारको निर्णयप्रति चौतर्फी विरोध भइरहेको छ।

सत्तारुढ दल नेपाल कांग्रेसका नेताहरू विशेष गरी गगन थापा, विश्वप्रकाश शर्मा, र डा. शेखर कोइरालाले यस निर्णयको विरोध जनाएका छन्। सोमबार मन्त्रिपरिषद्ले कुलमानलाई हटाएर हितेन्द्रदेव शाक्यलाई नयाँ कार्यकारी प्रमुखको रूपमा नियुक्त गर्ने निर्णय गरेको थियो। कांग्रेसका नेताहरूले सरकारको यो कदमलाई कुशासनको निरन्तरता र गलत निर्णय भन्दै आलोचना गरेका छन्।

डा. शेखर कोइरालाले भने, “कुलमान घिसिङलाई हटाउने निर्णयको सरकारले पुष्टि गर्न सक्दैन, यसमा हाम्रो कुनै स्वामित्व पनि छैन।” उनले थपे, “यसरी कति दिन चल्ने र चलाउने? विनाशकाले विपरीत बुद्धि अपनाएको छ।” कांग्रेसका नेताहरूले यो निर्णयलाई चर्को आलोचनासँगै असंवैधानिक र अन्यायपूर्ण ठानिरहेका छन्।