काठमाडौं । नेपाल आयल निगमले पेट्रोलियम पदार्थको मूल्य बढाएको छ ।
निगमले बुधबार रातिबाट लागू हुने गरी पेट्रोलमा २ रुपैयाँ र डिजेल तथा मट्टितेलमा समान ३/३ रुपैयाँ प्रतिलिटरका दरले मूल्यवृद्धि गरेको हो । मूल्य बढेसँगै काठमाडौं उपत्यकामा पेट्रोल १ सय ६५ र डिजेल तथा मट्टितेल १ सय ५६ रुपैयाँ प्रतिलिटर पुगेको छ ।
इण्डियन आयल कर्पोरेसनबाट बुधबार दिउँसो पेट्रोलको खरिद मूल्य २ दशमलव २४ रुपैयाँ र डिजेलको खरिद मूल्य ३ दशमलव ५५ रुपैयाँ प्रतिलिटर बढेर आएकाले नेपाली बजारमा मूल्य बढाइएको निगमले प्रेस विज्ञप्तिमार्फत जानकारी दिएको छ । यससँगै अब पेट्रोलको नयाँ मूल्य पहिलो वर्गमा प्रतिलिटर १६२ दशमलव ५०, दोस्रोमा १ सय ६४ र तेस्रोमा १ सय ६५ रुपैयाँ कायम भएको छ ।
डिजेल र मट्टितेलको पहिलो वर्गमा १५३ दशमलव ५०, दोस्रोमा १ सय ५५ र तेस्रो १ सय ५६ रुपैयाँ भएको छ ।
प्रतिक्रिया