गुल्मीबाट प्यूठान गौमुखी जाँदै गरेको जीप दुर्घटना, १२ जना घाइते

गुल्मी । गुल्मी र प्युठान जिल्लाको सिमाना अग्लुङ्ग फेदीमा जीप दुर्घटना हुँदा १२ जना घाइते भएका छन्।

मालिका गाउँपालिका ८, सिमलटारीदेखि प्युठान गौमुखीतर्फ जाँदै गरेको ग १ ज ४५३३ नम्बरको जीप दुर्घटना भएको जिल्ला प्रहरी कार्यालय गुल्मीले जनाएको छ। प्रहरीका अनुसार जीपमा १२ जना सवार रहेका थिए । जीपमा सवार सबै १२ जनानै घाइते भएका छन् ।

प्रहरीले दिएको जानकारी अनुसार घाइते सबैको अवस्था सामान्य रहेको र विभिन्न अस्पतालहरुमा उपचारका लागि पठाइएको छ । जीपमा सवार सबै माघे संक्रान्तीका दिन धार्मिक स्थल गौमुखीमा दर्शन र मेला अवलोकनका लागि जाँदै थिए । सवारी चालकको स्वास्थ्य अवस्था सामान्य रहेको बताइएको छ। जीप सडकदेखि १० देखि १५ मिटर तल खसेको छ।

घटना बारे थप अनुसन्धान भइरहेको प्रहरीले जनाएको छ।