काठमाडौं । मौसममा आएको खराबिका कारण आइतबार देशभरमा विभिन्न विमानस्थलबाट हुने हवाई उडान प्रभावित भएको छ ।
काठमाडौं उपत्यका सहित देशका विभिन्न जिल्लाहरुमा बाक्लो हुस्सु लागिरहेकाले ‘भिजीबिलिटी’ कमजोर हुँदा आन्तरिक हवाई उडान प्रभावित भएको हो । त्रिभुवन अन्तर्राष्ट्रिय विमानस्थलमा भिजुअल फ्लाइट रुल्स (भिएफआर) उडान भइरहे पनि काठमाडौं बाहिरका अधिकांश विमानस्थलमा बिहान हवाई उडान हुनसकेको छैन।
नेपाल नागरिक उड्डयन प्राधिकरणका अनुसार आइतबार बिहान भद्रपुर, भरतपुर, पोखरा र सुर्खेतबाहेक अन्य विमानस्थलमा उडान हुन सकिरहेको छैन् । त्रिभुवन अन्तर्राष्ट्रिय विमानस्थलमा भने आन्तरिक र अन्तर्राष्ट्रिय दुवै उडान नियमित रूपमा सञ्चालन भइरहेको छ।
पश्चिमी न्यूनचापीय प्रणालीको आंशिक प्रभावले देशका अधिकांश स्थानमा आंशिकदेखि साधरणतया बदली रहेको जल तथा मौसम विज्ञान विभाग मौसम पूर्वानुमान महाशाखाले जनाएको छ। महाशाखाका अनुसार पश्चिमी न्यूनचापीय प्रणालीको बढी प्रभाव सोमबार र मङ्गलबार रहने भएकाले बदली र वर्षाको सम्भावना रहेको छ ।
जसका कारण हवाई उडानलाई झनै प्रभाव पार्ने देखिन्छ ।
प्रतिक्रिया