भारतलाई पराजित गर्दै अष्ट्रेलिया टेष्ट च्याम्पियनसीपको फाइनलमा

काठमाडौं । पाँचौ तथा निर्णयक टेस्टमा भारतलाई पराजित गर्दै अष्ट्रेलियाले आइसिसी वल्र्ड टेष्ट च्याम्पियनसीपको फाइनलमा आफ्नो स्थान सुरक्षित गरेको छ ।

अस्ट्रेलियाले पाँचौं टेष्टमा भारतलाई ६ विकेटले पराजित गर्दै टेष्ट च्याम्पियनसीपको फाइनलमा स्थान बनाएको हो । सिडनी क्रिकेट मैदानमा जितका लागि १ सय ६२ रनको लक्ष्य पाएको अस्ट्रेलियाले चार विकेट गुमाएर त्यसलाई प्राप्त गरेको थियो । यससँगै अस्ट्रेलियाले बोर्डर–गावस्कर सिरिज ३–१ ले जितेको छ ।

अस्ट्रेलियाका लागि बेउ वेबस्टरले ३९ र ट्रेभिस हेडले ३४ रन बनाएका थिए । उनीहरूले पाँचौं विकेटका लागि ५८ रनको नटआउट साझेदारी गरे । घरेलु टिममका लागि ओपनर उस्मन ख्वाजाले सर्वाधिक ४१ रन बनाए । यस्तै, अर्को ओपनर साम कोन्टासले २२ रनको योगदान दिए ।

भारतीय बलरमध्ये प्रसिद्ध कृष्णले ३ विकेट लिए । यसअघि भारत आफ्नो दोस्रो इनिङ्समा १ सय ५७ रन बनाएर अलआउट भएको थियो । भारतले ६ विकेट गुमाएर १ सय ४१ रन बनाएर दिनको सुरु गरेको थियो र टिम अस्ट्रेलियाली धारिलो बलिङसामु लामो समय टिकेन् र चाँडै सबै विकेट गुमायो ।