काठमाडौं । मुग्लिङ–नौबिसे सडकखण्ड आजदेखि एक साता दैनिक ३ घण्टा बन्द हुने भएको छ ।
पृथ्वी राजमार्गअन्तर्गत सो सडकखण्डको पोखरेभीर र विशालटारमा चट्टान काटेर घुम्ती सुधार गर्नका लागि आइतबारदेखि सडक बन्द गर्न लागिएको हो ।
पुस ३ गते जिल्ला सुरक्षा समितिको बैठकले सडक बन्द गरेर मोड सुधारको काम गर्ने निर्णय गरेको थियो । सोहि निर्णयका अनुसार आज पुस ७ गतेदेखि पुस १३ गतेसम्म बिहान ११ बजेदेखि दिउँसो २ बजेसम्म सडक बन्द हुनेछ ।
सडक बन्द हुने अवधिमा सवारी साधनहरुलाई पोखरेभीर मोड सुधारका लागि गल्छी–बैरेनी र चालिसेमा भारी सवारीसाधनहरुलाई रोकिने छ भने हलुका सवारी साधन जरेखेत र घाटबेसीमा रोकिनेछ ।
त्यस्तै विशालटार मोड सुधारका लागि भारी सवारी साधन मझिमटार र बेनीघाटमा तथा हलुका सवारी साधन चरौदी बजार र विशालटारमा रोकिने छ । एम्बुलेन्स र सुरक्षा निकायका सवारीसाधनलाई भने बाटो खुला गरिने बताइएको छ ।
प्रतिक्रिया