काठमाडौं । प्रतियोगितामा उत्कृष्ट सुरुवात गरेको जनकपुर बोल्ट्सले बिहीबार बिहान आफ्नो तेस्रो खेल पोखरा एभेन्जर्स सँग खेल्दैछ ।
आफ्नो पहिलो खेलमा विराटनगर किंग्स र दोस्रो खेलमा कर्णाली याक्स जस्ता बलिया टिमविरुद्ध सानदार जित निकालेको जनकपुरले लागतार तेस्रो जित निकाल्दै उपाधिका लागि सुरुवाति दाबेदारिता प्रस्तुत गर्न चाहन्छ । प्रतियोगितामा सुखद सुरुवात गरेको जनकपुरको टीम पनि लयमा देखिन्छ ।
विराटनगर विरुद्धको पहिलो खेलमा नेपाली खेलाडीहरुले खासै राम्रो प्रदर्शन गर्न सकेनन् । ओपनरद्वय अनिल साह र आशिफ शेख सस्तैमा रोकिनु पर्यो । तर, कर्णाली याक्सविरुद्धको दोस्रो खेलमा भने अनिल र आशिफको ओपनिङ पाटर्नरसिप सानदार रह्यो । अनिलले अविजित ६२ रनको पारि खेल्दा टिमले सम्मानजनक जित निकाल्न सफल भयो ।
अनिल साह म्यान अफ दि म्याच घोषित भए । टीममा प्रभावशाली विदेशी खेलाडीहरुको आगमनले झनै जनकपुरलाई मजबुत बनाएको छ ।
यता, आफ्नो पहिलो खेलमा लज्जास्पद हार व्यहोरेको पोखरा एभेन्जर्स दोस्रो खेलमा जनकपुरलाई पराजित गर्दै प्रतियोगिताका कम्ब्याक गर्न चाहान्छ । मंगलबार भएको चितवन राइनोजविरुद्धको पहिलो खेलमा पोखरा ८७ रनको फराकिलो अन्तरले पराजित भएको थियो ।
चितवनले दिएको १ सय ६२ रनको लक्ष्य पछ्याएको पोखरा १३ दशमलव २ ओभरमा ७४ रन बनाउँदै अलआउट हुन पुग्यो । जारी एनपीएलमा कुनैपनि टोलीले बनाएको यो सबैभन्दा कम स्कोर हो । खराब सुरुआत गरेको पोखराले ४ ओभरमा ७ रन बनाउँदा ६ विकेट गुमाएको थियो । पोखराका कप्तान कुशल भुर्तेल पहिलो ओभरको पहिलो बलमै आउट भएका थिए ।
यस्तै टप अडरका ब्याटरहरु दिलीप नाथ पाँचौ बल र बास डे लिड पहिलो ओभरको अन्तिम बलमा शुन्य रनमै आउट भएका थिए । त्यसपछि मिडल अडरका ब्याटस्म्यानहरु पनि सम्हालिन नसक्दा पोखराले लज्जास्पद हार व्यहोर्नु परेको थियो । त्यो हारको घाउ निको बनाउनै भएपनि पोखराले भोलिको खेलमा आफूलाई प्रमाणित गर्नैपर्ने चुनौति देखिन्छ ।
तर, प्रतियोगिताका उत्साहजनक प्रदर्शक गरिरहेको जनकपुरलाई रोक्न भने पोखरालाई सहज भने छैन् । त्यसका लागि बलिङ र ब्याटिङमा देखिएका कमजोरिलाई सुधार गर्दै टिमलाई सम्हालेर अघि बढ्नुपर्ने चुनौती कप्तान भुर्तेलको काँधमा छ ।
त्रिवि क्रिकेट मैदानमा हुने उक्त खेल भने बिहान ९ बजेर १५ मिनेटमा सुरु हुनेछ ।
प्रतिक्रिया